Прэзідэнты і кіраўнікі ўрадаў дзяржаваў – чальцоў NATO збіраюцца 3 снежня ў Лондане адсвяткаваць 70-ю гадавіну арганізацыі.
4 снежня кіраўнікі краінаў NATO плануюць абмеркаваць бягучыя праблемы бяспекі і прыняць рашэнні адносна ўдасканалення дзейнасці альянсу, паведамілі ў арганізацыі.
Чакаецца, што яны пагодзяцца паляпшаць баявую гатовасць саюзных сілаў, прызнаюць космас у якасці аператыўнай вобласці сваёй дзейнасці і абновяць план барацьбы з тэрарызмам.
Таксама лідары дзяржаваў маюць правесці стратэгічную дыскусію пра Расею, будучыню кантролю над узбраеннямі ды пра ўздым Кітая. Чакаецца, што будзе абмеркаваны і падзел фінансавых абавязкаў у межах альянсу.
Правядзенне саміту ўскладняецца крытыкай сітуацыі ў NATO з боку прэзідэнтаў ЗША Доналда Трампа і Францыі Эманюэля Макрона, а таксама нязгодай Турцыі з планамі абароны краін Балтыі і Польшчы. Апроч таго, не ўсе краіны альянсу жадаюць павысіць свае выдаткі на абарону да 2 % ВУП.
МГ belsat.eu
