Следчы камітэт Беларусі заявіў, што супраць «20 так званых аналітыкаў Ціханоўскай» распачатае спецыяльнае вядзенне. Усе фігуранты справы застаюцца за мяжой.
У прэс-рэлізе сцвярджаецца, што аналітыкі «далучыліся да змовы з мэтай захопу дзяржаўнай улады ў Рэспубліцы Беларусь неканстытуцыйным шляхам, увайшлі ў экстрэмісцкія фармаванні, створаныя для забеспячэння эфектыўнасці злачыннай дзейнасці».
«Указаныя асобы прымалі актыўны ўдзел у выпрацоўванні і рэалізацыі канцэпцыі дэструкцыйнай дзейнасці, скіраванай на прычыненне шкоды нацыянальнай бяспецы Рэспублікі Беларусь, а таксама судзейнічалі распальванню сацыяльнай варожасці і разладу ў грамадстве», – заяўляюць у СК.
У афіцыйным тэлеграм-канале «Специальное производство» 25 студзеня з’явіліся імёны аналітыкаў, супраць якіх распачатае спецыяльнае вядзенне:
- Рыгор Астапеня,
- Філіп Біканаў,
- Аляксандр Дабравольскі,
- Юры Дракахруст,
- Андрэй Казакевіч,
- Ганна Красуліна,
- Яўген Крыжаноўскі,
- Дзяніс Кучынскі,
- Вераніка Лапуцька,
- Алесь Лагвінец,
- Ганна Любакова,
- Васіль Навумаў,
- Пётр Рудкоўскі,
- Марыя Рогава,
- Алеся Руднік,
- Павел Усаў,
- Наталля Рабава,
- Таццяна Чуліцкая,
- Аляксандр Шлык,
- Кацярына Шмаціна.
Аналітыкам інкрымінуюцца артыкулы 130, 357, 361 і 361-1 Крымінальнага кодэксу Беларусі. Усім фігурантам справы Следчы камітэт прапануе прыйсці на адрас: г. Менск, вул. Першамайская, 7 (у гэтым будынку месціцца УСК г. Менску). Дата пачатку спецыяльнага вядзення – 24 студзеня.
Нагадаем, механізм спецыяльнага вядзення дазваляе ўладам Беларусі судзіць сваіх апанентаў завочна, калі тыя застаюцца за мяжой.
Глеб Нержын belsat.eu
