Украіна выйшла з шэрагу пагадненняў з Беларуссю, у тым ліку аб паветраных зносінах
Украінскі ўрад спыніў дзеянне некалькіх пагадненняў, заключаных у розныя гады паміж Урадам Украіны і Кабінетам Міністраў Беларусі. Пра гэта паведаміў прадстаўнік кабінета міністраў у Вярхоўнай радзе Тарас Мэльнычук.
Украіна скасавала дзеянне пагаднення з Беларуссю аб паветраных зносінах, якое было заключана ў 1995 годзе. Гэта пагадненне дазваляла Беларусі і Украіне ажыццяўляць авіярэйсы і пасадкі на тэрыторыях гэтых краінаў.
Нагадаем, беларускія самалёты не лятаюць над украінскай тэрыторыяй і наадварот з 2021 года, праз інцыдэнт з самалётам «Ryanair» у траўні 2021 года. Тады ва Украіне заявілі, што «сітуацыя з прымусовай пасадкай самалёта кампаніі Ryanair у Менску з’яўляецца парушэннем Канвенцыі аб міжнароднай грамадзянскай авіяцыі».
Таксама спынена дзеянне наступных пагадненнящ паміж Урадам Украіны і Кабінетам Міністраў Рэспублікі Беларусь:
- аб узаемных пастаўках у 1995 годзе ўзбраення, ваеннай тэхнікі, іншых матэрыяльных сродкаў і паслуг для патрэб абароны і бяспекі, падпісана ў 1994 годзе;
- аб дадатковых мерах даверу і бяспекі, падпісана ў 2001 годзе;
- аб правядзенні сумесных навукова-даследчых і даследна-канструктарскіх работ у галіне ўзбраення і ваеннай тэхнікі, падпісана ў 2005 годзе;
- аб узаемнай ахове правоў на вынікі, створаныя і прадастаўленыя ў ходзе двухбаковага ваенна-тэхнічнага супрацоўніцтва, падпісана ў 2005 годзе.
Раней Украіна выйшла з пагаднення аб гарантыях правоў грамадзян дзяржаў СНД у сферы пенсіённага забеспячэння і пагаднення аб касмічным супрацоўніцтве з Беларуссю.
Алена Рувіна belsat.eu
