22 чэрвеня прэзідэнт Украіны Уладзімір Зяленскі звольніў з пасады Надзвычайнага і Паўнамоцнага Пасла Украіны ў Рэспубліцы Беларусь Ігара Кізіма.
Ад сённяшняга дня ўкраінскага пасла ў Беларусі больш няма.
Нагадаем, што 19 красавіка пасол Украіны ў Беларусі Ігар Кізім быў адкліканы для кансультацый у Кіеў. Нагодай для такога кроку стаў прыезд кіраўніка так званай «Данецкай народнай рэспублікі» Дзяніса Пушыліна ў Менск і сустрэча яго з Аляксандрам Лукашэнкам.
Нягледзячы на тое, што ў 2022 годзе Беларусь стала саўдзельніцай ваеннай агрэсіі супраць Украіны, пасол гэтай краіны яшчэ больш за год працаваў у Беларусі. Многія палітолагі звязвалі гэта з тым, што Кіеў доўгі час пакідаў сабе невялікае акенца для перамоваў з рэжымам. На думку ўкраінскага палітолага Яўгена Магды, Украіна не была зацікаўлена ў разрыве дыпламатычных адносінаў, бо гэта магло б павялічыць шанцы на ўдзел Беларусі ў беспасярэднім уварванні ва Украіну.
Раман Шавель belsat.eu
