Заходнія выведкі: Пуцін не гатовы да перамоваў і можа мабілізаваць яшчэ 1 млн чалавек
Прэзідэнт Расеі Уладзімір Пуцін не гатовы да перамоваў і можа мабілізаваць яшчэ мільён чалавек на вайну супраць Украіны. Пра гэта заявіў кіраўнік Федэральнай разведвальнай службы Нямеччыны (BND) Бруна Каль у інтэрв’ю Redaktions Netzwerk Deutschland.
Паводле Каля, Пуцін не гатовы да перамоваў і спрабуе дамагчыся як мага большых поспехаў на полі бою, каб затым, магчыма, дыктаваць мір на сваіх умовах.
Кіраўнік BND таксама ацаніў мабілізацыйны патэнцыял Расеі:
«Мабілізацыйны патэнцыял Расеі – гэта рэзерв да мільёна чалавек, калі Крэмль палічыць гэта неабходным».
Таксама і брытанская выведка паведамляе, што Пуцін у сваім пасланні 21 лютага даў зразумець, што хоча працягваць вайну. У Мінабароны Вялікай Брытаніі адзначылі, што ён працягнуў прамову ў тым жа духу, што і шэсць месяцаў таму, у прыватнасці, падаючы сумнеўны наратыў аб экзістэнцыйнай барацьбе і кажучы, што ўсё «ідзе паводле плану».
Аднак ніякіх практычных захадаў для выхаду Расеі з тупіку на поле бою Пуцін не назваў. У разведцы лічаць, што гэта робіць ягоныя заявы неэфектыўнымі.
Якуб Хруст belsat.eu
