Наймітам Лукашэнкі набылі браняваны джып за 315 тысяч долараў. Расследаванне «BELPOL»
Супольнасць былых беларускіх сілавікоў «BELPOL» падзялілася з «Белсатам» звесткамі пра новы аўтамабіль кампаніі «ГардСэрвіс» – прыватнай ахоўнай кампаніі, звязанай з Аляксандрам Лукашэнкам, гэткіх беларускіх дзяржаўных вагнэраўцаў.
Былыя сілавікі «BELPOL» здабылі шэраг дакументаў, што датычаць набыцця браняванага аўтамабіля «AG 41 8340» беларускай кампаніі «ГардСэрвіс» у складзе расейскай «АрморГрупп».
Паводле дакументаў, здабытых «BELPOL», угоду заключылі 25 верасня 2023 года, а ўжо 26 кастрычніка прадавец выслаў рахунак на ўнясенне рэшты сумы пасля перадаплаты.
Браняваны аўтамабіль, які ёсць прадметам дамовы, створаны на базе ўсюдыхода «Toyota LC 300» (LC значыць «Land Cruiser»), на які навешалі прыхаваную браню, здольную спыніць кулю аўтамата Калашнікава з дыстанцыі 10 метраў. Аўтамабіль мае серыйны нумар (VIN) XWN418340P5000039, створаны на базе машыны з серыйным нумарам JTMAB7BJ7P4061944 (базы звестак паводле VIN-нумара паказваюць, што гэта сапраўды «Land Cruiser» 2022 года выпуску), колер чорны.
Цана машыны – 24 451 666 расейскіх рублёў, але беларускі бок мусіць скампенсаваць прадаўцу падатак на дададзеную вартасць – 4,89 мільёна расейскіх рублёў. Агулам у доларавым эквіваленце на момант імавернага падпісання дамовы гэта 314 760 долараў.
Выглядае, што беларускі бок купляе амаль што базавую камплектацыю: на сайце прадаўца такі браняваны «Land Cruiser» прадаюць ад 27 мільёнаў расейскіх рублёў. Дарэчы, гэта адзіная машына, на якую на гэтым сайце пазначылі цану, астатнія – «на запыт» (а ёсць і «Mercedes’ы», і УАЗы).
У дамовах пазначана, што «ГардСэрвіс» рэпрэзентуе намеснік дырэктара Аляксандр Кулакевіч, а пераганяць аўтамабіль мае кіроўца Уладзімір Падалінскі. Гэтыя асобы ёсць на «Чорнай мапе»: паводле здабытых хакерамі і актывістамі звестак, Кулакевіч быў начальнікам аднаго з упраўленняў Галоўнага выведнага ўпраўлення Генеральнага штабу Узброеных сілаў Беларусі і праходзіў правяранне Камітэтам дзяржаўнай бяспекі для працы ў «ГардСэрвісе», Падалінскі працаваў у Службе бяспекі прэзідэнта (пазначаны ў дамовах нумар пашпарта Падалінскага супадае з пазначаным на «Чорнай мапе»).
Кампанію «ГардСэрвіс» заснавалі 21 лістапада 2019 года, раней яна звалася «БелСек’юрыціГруп». 18 чэрвеня 2020 года Аляксандр Лукашэнка дазволіў кампаніі ўжываць агнястрэльную зброю – гэта адзіная прыватная кампанія, якая мае такі дазвол. Праз месяц пасля таго дазволу ў беларускім санаторыі затрымалі, як сцвярджалася, баевікоў расейскай Групы Вагнэра, але іх неўзабаве адпусцілі. «ГардСэрвіс» трапіў пад санкцыі Еўразвязу, Злучаных Штатаў і Вялікай Брытаніі ў снежні 2021 года. Але, як сцвярджалі ўкраінскія расследавальнікі, у 2023 годзе вагнэраўцам дазволілі далучыцца да «ГардСэрвісу» і з’ехаць ваяваць у адну з краінаў Цэнтральнай Афрыкі.
Для якіх мэтаў і на чые грошы «ГардСэрвіс» купляе браняваны джып, у кантрактах не значыцца.
«BELPOL» жа абяцае неўзабаве апублікаваць новае вялікае расследаванне пра лукашэнкаўскіх сілавікоў.
Вялікае расследаванне пра «ГардСэрвіс» і яго дзейнасць выйдзе ў нядзелю на YouTube-канале «BELPOL», а таксама ў праграме «Тыдзень».
Алесь Наваборскі belsat.eu
