«Белсат» падводзіць вынікі 538-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 15 жніўня чытайце ў нашым аглядзе.
Купянскі і ліманскі кірункі (паўночна-ўсходняя частка Харкаўскай вобласці, захад Луганскай і поўнач Данецкай)
На купянскім кірунку працягваюцца баі каля сяла Сынькоўка ў Харкаўскай вобласці. Паводле аналітыкаў праекту «Deepstate», пакуль расейскія вайскоўцы не маюць поспеху.
Таксама Узброеныя сілы РФ няўдала атакавалі каля сяла Андрэеўка ў Сватаўскім раёне Луганскай вобласці, але і тут украінскім вайскоўцам удалося ўтрымаць свае пазіцыі.
Тэлеграм-канал «Рыбарь» піша, што далей на поўдзень па лініі фронту актыўнічаюць Збройныя сілы Украіны. У прыватнасці, паведамляецца пра штурмавыя дзеянні з боку ўкраінцаў на захадзе ад Кармазынаўкі, на так званым торскім выступе, а таксама ў Серабранскім лясніцтве. Паводле крыніцы, паўсюль ЗСУ не дасягнулі поспеху.
Разам з тым «Рыбарь» мяркуе, што неўзабаве ўкраінцы могуць перайсці ў больш маштабны наступ на паўночным усходзе краіны, паколькі цяпер фіксуецца назапашванне жывой сілы і артылерыі ЗСУ ўздоўж гэтага ўчастку фронту.
Бахмуцкі кірунак (ваколіцы аднайменнага райцэнтру ў Данецкай вобласці)
Расейскі ваенкар Сямён Пегаў піша пра няўдалую атаку войскаў РФ каля сяла Вясёлае (на паўночным усходзе ад гораду Салядар).
Разам з тым, па-ранейшаму на бахмуцкім кірунку найбольшая актыўнасць абодвух бакоў канфлікту назіраецца на поўдні ад аднайменнага раённага цэнтру.
У «Deepstate» фіксуюць пра чарговыя спробы Узброеных сілаў РФ вярнуць раней страчаныя пазіцыі каля населеных пунктаў Клішчыеўка і Андрэеўка – пакуль безвынікова.
Тэлеграм-канал «Бахмутський Демон» адзначае, што ў ваколіцах Клішчыеўкі расейцы нясуць вялізныя страты ў жывой сіле, што ў першую чаргу выклікана выкарыстаннем ЗСУ артылерыі і ўдарных БпЛА.
Аўдзееўскі і мар’інскі кірункі (на поўначы і захадзе ад Данецку)
У ваколіцах Данецку расейскія вайскоўцы намагаюцца атачыць Аўдзееўку, а таксама заняць Мар’інку. Між тым пакуль украінцам удаецца стрымліваць праціўніка.
Таксама УС РФ цягам апошніх содняў узнавілі атакі на Краснагораўку, але і тут не дасягнулі поспеху.
Бярдзянскі кірунак (лінія фронту на мяжы Данецкай і Запарожскай вобласцяў)
На стыку Данецкай і Запарожскай вобласцяў ініцыятыва захоўваецца за Збройнымі сіламі Украіны.
У тэлеграм-канале расейскага батальёну «Восток» прызналі адыход сваіх вайскоўцаў з сяла Уражайнае.
«Рыбарь» піша, што цяпер ЗСУ намагаюцца акапацца на паўднёвых ускрайках населенага пункта. Пры гэтым расейцы засяродзіліся на нанясенні артылерыйскіх і авіяцыйных удараў па праціўніку.
У гэты ж час дыверсійна-выведныя групы ўкраінцаў пры падтрымцы артылерыі атакавалі пазіцыі войскаў РФ у суседнім сяле Завітнае Бажання.
Крыніца мяркуе, што неўзабаве Збройныя сілы працягнуць маштабны наступ адразу на трох кірунках: у бок сёлаў Прыютнае, Старамлынаўка і Новаданецкае (на ўсходзе, поўдні і захадзе ад участку Старамаёрскае – Уражайнае). Такім чынам будзе рыхтавацца своеасаблівы калідор для прарыву ў бок Азоўскага мора.
Мэлітопальскі кірунак (лінія фронту ў Запарожскай вобласці)
«Deepstate» піша, што на мэлітопальскім кірунку працягваюцца баі ў сяле Работына, а таксама ў яго ваколіцах (Палогаўскі раён Запарожскай вобласці).
Пегаў піша, што ЗСУ штурмуюць паўночныя ўскрайкі населенага пункта, а таксама імкнуцца выйсці да паўднёва-ўсходніх межаў, каб у выніку атачыць групоўку расейцаў.
Адначасова з гэтым украінцы атакуюць каля сёлаў Вэрбовае і Капані (на ўсходзе і захадзе ад Работына адпаведна), што ўказвае на падрыхтоўку шырокага плацдарму для далейшага прасоўвання на поўдзень.
«Рыбарь» паведамляе пра назапашванне рэзерваў ЗСУ каля Малой Такмачкі, якія ў выпадку поспеху пад Работынам будуць кінутыя на прарыў у бок гораду Такмак.
Таксама на мэлітопальскім кірунку ЗСУ адзначыліся актыўнасцю каля сёлаў Даражнянка і Пятыхаткі (у ваколіцах гарадоў Гуляйполе і Васілеўкі адпаведна). Імаверна, такім чынам украінскае камандаванне спрабуе расцягнуць абарону праціўніка перад спробамі прарыву на поўдзень.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Таццяна Міронава belsat.eu
