Польшча адзначае 11 лістапада Нацыянальнае свята незалежнасці ў гонар аднаўлення незалежнай дзяржавы ў 1918 годзе. У прамове на ўрачыстай цырымоніі ў цэнтры Варшавы выступалі прэзідэнты Польшчы і Літвы.
Прэзідэнт Польшчы Анджэй Дуда сярод іншага згадаў Беларусь, калі звяртаўся да госця – прэзідэнта Літвы Гітанаса Наўседы:
«Літва і Польшча разам, суверэнныя, незалежныя, гордыя, моцныя, – казаў Дуда ў вітанні Наўседу. – Гэта ўмацаванне бяспекі нашай часткі Еўропы. Я веру, што мы разам тут — краіны Балтыі, чальцы NATO, я веру, што ёсць нашы саюзнікі з поўдня, я веру, што духам з намі сёння многія сябры з Украіны, а таксама нашыя сябры і суседзі з Беларусі, з глыбокім жаданнем свабоднай і суверэннай дзяржавы».
Ва Украіне, дадаў Дуда, добра зразумела, што значыць еднасць і падтрымка, што значыць, «калі не застаўся сам, як стала з Украінай у 2014 годзе, калі амаль ніхто не пайшоў з рэальнай, моцнай, рашучай дапамогай». Ён заклікаў працягваць цяперашнюю дапамогу Украіне, бо «гэта таксама дзейнасць дзеля бяспекі Польшчы».
Дуда таксама задаў пра міграцыйны крызіс на беларуска-польскай мяжы, назваў яго гібрыднай атакай на Польшчу. Ён падзякаваў палякам за абарону мяжы і дапамогу памежнікам.
Наўседа ў сваёй прамове сярод іншага згадаў, што сяброўства між Літвой і Польшчай «нарадзілася ў Крэве» – у гэтым мястэчку цяперашняга Смаргонскага раёну Беларусі ў 1385 годзе падпісалі унію Польскае каралеўства і Вялікае княства Літоўскае.
Алесь Наваборскі belsat.eu
