Прэзідэнт Украіны стаўся першым лідарам замежнай дзяржавы, каму патэлефанавала прызначаная нядаўна прэм’ер-міністарка Вялікай Брытаніі Ліз Трас. Яна заявіла падчас размовы пра непахіснае падтрыманне Вялікай Брытаніяй свабоды і дэмакратыі ва Украіне, паведамляе офіс прэмʼеркі.
У размове Ліз Трас запэўніла Уладзіміра Зяленскага, што «ён мае яе поўную падтрымку, а Украіна можа разлічваць на дапамогу Вялікай Брытаніі ў доўгатэрміновай перспектыве».
«Лідары абмеркавалі неабходнасць умацаваць глабальную бяспеку і захады для спынення фінансавання, якое падсілкоўвае ваенную машыну Уладзіміра Пуціна», – гаворыцца ў паведамленні прэс-службы офісу прэм’ер-міністаркі Вялікай Брытаніі.
Ліз Трас высока ацаніла барацьбу ўкраінцаў за суверэнітэт і самавызначэнне ды сказала, што вельмі важна, каб Украіна дасягнула поспеху, а Расея зазнала няўдачу.
Уладзімір Зяленскі паведаміў у Twitter, што падчас размовы з Ліс Трас яны абмеркавалі ўдзел Вялікай Брытаніі ў аднаўленні Украіны і скаардынавалі далейшы ціск на Расею:
«Мэта – спыніць агрэсію і прыцягнуць вінаватых да адказнасці. Важна прызнаць РФ тэрарыстычнаю дзяржаваю. Мы працягнем актыўнае ўзаемадзеянне ўва ўсіх фарматах».
Прэзідэнт Украіны таксама паведаміў, што запрасіў прем’ер-міністарку Ліз Трас ва Украіну. Паводле офісу прэм’еркі, яна «з радасцю прыняла гэтае запрашэнне».
Ліз Трас 6 верасня сталася новаю прэм’ер-міністаркаю Вялікай Брытаніі. У барацьбе за лідарства ў кіроўнай Кансерватыўнай партыі яна замяніла Борыса Джонсана, які пайшоў у адстаўку. Борыс Джонсан актыўна падтрымліваў Украіну і неаднаразова наведваў Кіеў падчас вайны.
Зміцер Міраш belsat.eu