У Херсонскай вобласці ўзарвалі плаціну Кахоўскай ГЭС. Праз пагрозу затаплення абвесцілі эвакуацыю
Аператыўнае камандаванне ЗСУ «Поўдзень» паведаміла ў Facebook, што расейскія акупацыйныя войскі ўзарвалі Кахоўскую ГЭС. Імаверныя раёны затаплення цяпер удакладняюцца. Абвесцілі эвакуацыю жыхароў небяспечных раёнаў.
Наступствы выбуху на Кахоўскай гідраэлектрастанцыі знялі на відэа. У ЗСУ вінавацяць у здарэнні расейскія войскі, акупацыйныя ўлады – украінскую армію.
Агенцтва «Reuters» апублікавала спадарожнікавы здымак Кахоўскай ГЭС пасля выбуху.
Кіраўнік Херсонскай абласной адміністрацыі Аляксандр Пракудзін абвясціў эвакуацыю жыхароў небяспечных раёнаў, што кантралюе Украіна. Ён сказаў, што ўзровень вады дасягне крытычнага ўзроўню праз 5 гадзінаў.
Выкід вады пагражае затапленнем тэрыторыяў Херсонскай вобласці. Людзей вывезуць з дзесяці паселішчаў на правым беразе Дняпра, акрамя таго, часткова эвакуююць Херсон. Паводле звестак расейскай інфармацыйнай кампаніі ТАСС, на гідраэлектрастанцыі разбураныя 11 з 28 пралётаў, а ў зону затаплення могуць трапіць 80 паселішчаў.
Прэзідэнт Украіны Уладзімір Зяленскі склікаў тэрміновае пасяджэнне Рады нацыянальнай бяспекі і абароны, паведаміў сакратар РНБА Аляксей Данілаў.
Раней пра пагрозу падрыву Кахоўскай ГЭС казалі падчас контрнаступу ЗСУ ў Херсонскай вобласці. Кіраўнік ГУР Кірыла Буданаў заяўляў, што падрыў дамбы зробіць немагчымым эксплуатацыю Паўночна-Крымскага каналу і Запарожскай АЭС, расейцы больш страцяць, чымся выйграюць, бо атрымаюць затапленне левабярэжнай часткі Херсонскай вобласці.
Уладзімір Зяленскі папярэджваў Маскву: «Любая вашая спроба падарваць Кахоўскую ГЭС і затапіць нашую тэрыторыю ды абязводзіць Запарожскую АЭС будзе азначаць абвяшчэнне вайны ўсяму свету».
Сяргей Крот belsat.eu
