Старшыня Сейму Літвы: Сітуацыя з маёрам МУС не падстава пагаршаць становішча беларусаў
Старшыня Сейму Літвы Вікторыя Чміліце-Нільсэн заявіла, што сітуацыя з былым маёрам з Беларусі Аляксандрам Маціевічам, які мае дачыненне да рэпрэсіяў, але атрымаў ВНЖ у Літве, не азначае, што санкцыі супраць беларусаў і расейцаў трэба зраўнаваць.
«З улікам плыні людзей на службы кладзецца вельмі вялікая нагрузка. Ёсць некаторыя выпадкі, якіх, вядома, хацелася б пазбегчы, але я не мяняю прынцыповай палітыкі, у адпаведнасці з якой мы прымаем прадстаўнікоў беларускай апазіцыі ці проста людзей, якія ратуюцца ад пераследу Лукашэнкі ў Літве», – сказала Вікторыя Чміліце-Нільсэн.
Уніфікацыя санкцыяў для беларусаў і расейцаў азначала б, што Літва адступае ад сваёй пазіцыі аб Беларусі, мяркуе старшыня Сейму:
«На мой погляд, гэтага рабіць не варта. Падобныя выпадкі могуць здарацца з розных прычынаў. Гэта не мяняе майго меркавання пра ўніфікацыю».
Летась Сейм Літвы прыняў закон аб абмежавальных захадах у дачыненні грамадзянаў Беларусі і Расеі, аднак для беларусаў абмежаванняў уведзена менш.
Тэрмін дзеяння закону заканчваецца 2 траўня 2024-га. Яго могуць падоўжыць яшчэ на год.
Далёка не ўсе літоўскія палітыкі згодныя з Чміліце-Нільсэн. Напрыклад, прэзідэнт Гітанас Наўседа заяўляе, што санкцыі супраць беларусаў і расейцаў мусяць быць аднолькавыя.
Аляксандр Маціевіч – беларускі маёр, які браў удзел у здушэнні пратэстаў у Лідзе ў 2020 годзе. Паводле звестак «BELPOL», Маціевіч таксама даваў паказанні ў судзе супраць адной з пратэстоўцаў, якая нібыта парвала сілавіку форму і збіла двух афіцэраў Лідскага РАУС.
Дэпартамент міграцыі Літвы ануляваў 1 лютага дазвол Маціевіча на часовае пражыванне.
Арсен Рудэнка belsat.eu
