Хакеры ўзламалі сайт інфармацыйна-аналітычнага цэнтру Міністэрства адукацыі Беларусі – giac.by. Пра гэта ўвечары 1 кастрычніка паведамляе Zerkalo.
Асобы, якія называюць сябе «Аб’яднаным штабам Супраціву», размясцілі на старонках сайта ліст, у якім заявілі, што Міністэрства адукацыі не выконвае свае задачы і зʼяўляецца «антынародным інструментам, закліканым увекавечыць уладу сямʼі Лукашэнкі на стагоддзі». Хакеры заклікаюць задумацца, чаму падручнікі і методыкі рыхтуюць з моладзі «новых «ябацек» і цярпілаў, рабоў кіроўнага рэжыму з цалкам выключаным крытычным мысленнем».
На іх думку, «год за годам ідзе планамернае разбурэнне сістэмы вышэйшай адукацыі», а міністрам прызначаны «тупы качок».
«Абʼяднаны штаб Супраціву лічыць, што Міністэрства адукацыі Рэспублікі Беларусь зʼяўляецца злачыннай арганізацыяй, якая вядзе этнацыд беларускага народу ў сваіх карыслівых мэтах. Гэтая арганізацыя атупляе нашых дзяцей, рыхтуючы быць рабамі гэтага рэжыму. Гэта недапушчальна і будзе спынена па меры развіцця сітуацыі», – заявілі хакеры.
У канцы ліста напісана: «Чакайце далейшых паведамленняў. Фідэль».
Цяпер сайт giac.by, на ім «ладзяцца тэхнічныя працы». Аднак ліст дасяжны ў вэб-архіве.
Якуб Хруст belsat.eu