Фонд Навальнага выявіў у намесніцы Сабяніна нерухомасць на сотні мільёнаў долараў

У першага намесніка мэра Масквы Наталлі Сяргунінай Фонд барацьбы з карупцыяй (ФБК) Аляксея Навальнага, выявіў нерухомасць на 6,5 мільярдаў рублёў (болей за 102 мільёны долараў ЗША).

Наталля Сяргуніна, згодна яе дэкларацыі – самы звычайны і даволі бедны чыноўнік мэрыі Масквы. Адзіная крыніца прыбыткаў намесніцы мэра – заробкі, а з нерухомасці яна за ўвесь час набыла толькі трохпакаёвую кватэру на Паўднёвым Захадзе Масквы.

Сама бедная, с сваякі – багатыя

Але насамрэч Фонд высветліў, што Сяргуніна зарабіла мільярды на продажы гарадской нерухомасці фірмам, падкантрольным яе сям’і. Цягам 2011-2018 гадоў яна прадала каля дзясятка дамоў у цэнтры Масквы кампаніям, бенефіцыярам якіх зʼяўляўся муж сястры Сяргунінай Лазар Сафаніеў. Кошты продажу элітных будынкаў ва ўсіх выпадках былі заніжаныя.

На месцы большасці будынкаў пабудаваныя гатэлі. А блізкія сваякі Сяргунінай у выніку зʼяўляюцца ўласнікамі элітнай нерухомасці ў Маскве і дарагіх аўтамабіляў. У сястры таксама ёсць два рэстараны, а ў яе мужа – маёнтак у Аўстрыі.

Сяргуніна адказная за пратэсты ў Маскве

На сайце Навальнага адзначаецца, што ў кампетэнцыі Наталлі Сяргунінай знаходзіцца і правядзенне выбараў у Масгардуму. Адмова сталічнага Выбаркаму зарэгістраваць на выбарах незалежных кандыдатаў прывяла да хвалі пратэстаў у Маскве. А Аляксей Навальны цяпер адбывае чарговыя 30 дзён арышту за заклікі да мітынгу.

СК belsat.eu