У 78 % пацыентаў з сярэдне-цяжкімі формамі COVID-19, якія ўзялі ўдзел у клінічным даследаванні супрацьмалярыйнага прэпарату «Мефлохин», назіраецца «станоўчая клінічная дынаміка», паведаміла Федэральнае медыка-біялагічнае агенцтва (ФМБА) Расеі.
Даследаванне праводзяць чатыры навукова-клінічныя цэнтры ФМБА. Медыкі правяраюць, наколькі «Мефлохин» бяспечны і эфектыўны падчас лячэння каронавіруса ў параўнанні з іншым супрацьмалярыйным прэпаратам – «Гидроксихлорохин».
У даследаванні ўзялі ўдзел 347 пацыентаў з каронавірусам. Паводле папярэдніх вынікаў, у 78 % пацыентаў з сярэдне-цяжкім станам назіраецца «станоўчая клінічная дынаміка, рэгрэс ці стабілізацыя зменаў у лёгачных тканках, па выніках камп’ютарнай тамаграфіі».
Дэтальныя высновы пра эфектыўнасць і бяспеку прэпарату ФМБА зробіць да 20 траўня.
17 красавіка Аляксандр Лукашэнка падчас паездкі на Гарадзеншчыну распавёў, як кіраўнік Віцебскай вобласці Мікалай Шарстнёў прасіў у яго супрацьмалярыйнай лекі. Відэа з маналогам прэзідэнта апублікаваў Telegram-канал «Пул Первого».
На Таблетка.бай пазначана, што «Мефлохин» нельга набыць у Беларусі.
Швейцарская кампанія «Hoffmann-La Roche» вырабляе «Мефлохин» пад назвай «Лариам». У 2009 годзе 450 чалавек накіравалі пазовы да вытворцы гэтага прэпарату ў звязку з цяжкімі наступствамі для здароўя.
У 2013 годзе Упраўленне па санітарным наглядзе за якасцю харчовых прадуктаў і медыкаментаў ЗША (Food and Drug Administration) паведаміла, што «неўралагічныя пабочныя эфекты [ад прэпарату «Мефлохин»] могуць з’явіцца ў любы час цягам прыёму прэпарату і могуць доўжыцца ад некалькіх месяцаў да некалькіх гадоў пасля таго, як прыём прэпарату быў спынены».
Прэпарат «Мефлохин» можа выклікаць галюцынацыі, шум у вушах, а таксама стаць прычынаю дэпрэсіі.
Больш падрабязна пра пабочныя эфекты прэпарату «Мефлохин» можна пачытаць у артыкуле «Psychiatric Side Effects of Mefloquine: Applications to Forensic Psychiatry», які быў апублікаваны ў 2013 годзе ў амерыканскім навуковым часопісе «The Journal of the American Academy of Psychiatry and the Law».
ЮВ belsat.eu