Перамога Уладзіміра Зяленскага на выбарах прэзідэнта Украіны – адная суцэльная эмоцыя. Спачатку прэзідэнцкая гонка здабыла славу поўнай паразы рацыянальнага на карысць эмацыйнага, а следам за ёю і дзень выбараў ператварыўся ў Новы год пасярод прахалоднага, як на Кіеў, канца красавіка. Першы выхад кандыдата-пераможца на сцэну штабу выглядаў як вяршыня творчасці «Кварталу 95». Аднак пра ўсё па чарзе.
Раніцу 21 красавіка Уладзімір Зяленскі пачынае ў чорных акулярах і кампаніі светлавалосай жонкі. Пара прыходзіць галасаваць на ардынарны выбарчы ўчастак у Абалонскім раёне. Зяленскі «свеціць» запоўнены бюлетэнь (магчыма, забыўшыся, бо гэта забаронена заканадаўствам Украіны і зараз пагражае кандыдату штрафам) і распавядае пра свой цудоўны настрой: прачнуўся бадзёрым, з’еў глазунню, жонка паставіла «Эмінема» дзеля ўзняцця духу. На пытанне, які трэк амерыканскага рэпера дапамагае перажыць дзень выбараў, Зяленскі дэманструе біт, інтэнсіўна ківаючы галавой.
Участак лідар рэйтынгаў пакідае на мікрааўтобусе BMW з цёмнымі фіранкамі.
У штабе Зяленскага і ягонай каманды цягам дня не бачна ні першага, ні астатніх.
«Ужо адчуваюць смак перамогі, – скардзіцца журналіст з Польшчы. – Не хочуць гаварыць з прэсай, сядзяць недзе ў сваёй VIP-зоне».
Выбарчы дзень тут каманда «зялёных» назвала «днём адчыненых дзвярэй», аднак наведнікаў у другім туры значна паболела, і ахова на ўваходзе стала больш прыдзірлівай.
Тых, хто патрапіў у сярэдзіну, штаб сустракае букетамі кветак і шматлікімі прапановамі баўлення вольнага часу.
Тут ёсць стол для пін-понга, фотазона, два бары і гучная музыка.
«Вы мне нагадваеце пасажыраў у цеснай маршрутцы. Зараз пачнеце перадаваць кіроўцу за праезд!» – цешацца вядоўцы выбарчага шоў.
Да абвяшчэння першых вынікаў экзіт-полаў засталіся апошнія хвіліны, і ажыятаж у штабе Зяленскага дасягае свайго апагею.
«Я люблю свою страну, люблю свою жену, люблю свою собаку..» – пачынае грымець на ўвесь штаб загалоўная кампазіцыя серыялу «Слуга народа».
Пад гэтую песню ў серыяле прэзідэнт з народу Васіль Галабародзька едзе па Кіеве на ровары і размахвае просценькім партфелем. Пад гэтую ж кампазіцыю на сцэну штабу дужыя ахоўнікі заводзяць кандыдата на прэзідэнта Зяленскага, які выканаў ролю Галабародзькі і, відавочна, усё яшчэ эмацыйна звязанага з роляю «простага хлопца з Крывога рогу» (гэтак кандыдат Зяленскі назваў сябе ў пятніцу пад час дэбатаў з Пятром Парашэнкам).
Побач з шоўменам нязменна – жонка Алена, якую Зяленскі цалуе ў розныя важныя перадвыбарчыя моманты. Магчыма, цяпер гэта стане іхнаю прэзідэнцкай традыцыяй.
На экране з’яўляюцца лічбы – першыя вынікі экзіт-пола, якія дэманструюць ашаламляльны разрыў паміж кандыдатамі. У Парашэнкі – 25,3 % галасоў, у той час, як за «простага хлопца» – 73,2 % апытаных. Зяленскі ў атачэнні людзей са сваёй каманды (ейных чальцоў кандыдат назваў і паказаў толькі ў чацвер, за тры дні да выбараў) узрываюць хлапушкі з канфеці. Будучы прэзідэнт, ня стрымліваючы эмоцыяў, скача.
Результаты выборов в штабе Зеленского / Украина
Так в штабе Зеленского праздновали результаты экзитполов. По всем он получил выше 70% голосов.
Opublikowany przez Вот Так TV / «Белсат» по-русски Niedziela, 21 kwietnia 2019
Зяленскі, як сапраўдны актор, што атрымаў важную ўзнагароду, дзякуе камандзе, жонцы і ўсім выбарнікам, што адгукнуліся на прапанову «зрабіць іх разам». Зала выбухае смехам, калі, пад час кароткага брыфінгу Зяленскаму задае пытанне журналіст з прозвішчам Галабародзька.
Адэля Дубавец, belsat.eu