«Федэрацыя прыгодніцкіх гонак» запланавала на 14 красавіка правядзенне веламарафону «Вітаўт» і аматарскага забегу «Жук-трэйл» у ваколіцах Крэва, але спартовая падзея апынулася пад пагрозаю. Першапачаткова Смаргонскі райвыканкам прапанаваў арганізатарам марафону і забегу аплаціць паслугі міліцыі – каля Br 6000.
Паводле беларускага заканадаўства, усе масавыя падзеі маюць адбывацца пры ўдзеле міліцыі. Калі дзяржаўныя органы не «бяруць пад крыло» такую падзею, то арганізатары маюць аплаціць паслугі беларускіх праваахоўнікаў. Грошай на міліцыю ў «Федэрацыі прыгодніцкіх гонак» не было.
Пасля рэзанансу ў медыях і сацыяльных сетках чыноўнікі вырашылі падтрымаць спартовую ініцыятыву.
«Урааа! Атрымалася! Дзякуй усім хто нам бачна і нябачна дапамагаў! Спадзяюся, што марафон і забег ля сцен Крэўскага замка стане добрай вясновай традыцыяй», – напісаў у «Facebook’у» кіраўнік «Федэрацыі прыгодніцкіх гонак» Міхаіл Сідарук.
У размове з Belsat.eu Міхаіл Сідарук дадаў, што «дэталі ўзаемадзеяння са Смаргонскім РАУС яшчэ не ўзгодненыя». У любым выпадку марафон і забег адбудуцца.
ЮВ belsat.eu