У абмен палоннымі паміж Украінаю і Расеяй трапіў беларус, які ваяваў на баку акупантаў
Украіна абмяняла грамадзяніна Беларусі Максіма Запеку, які ваяваў на баку Расеі і трапіў у палон летась пад Бахмутам у Данецкай вобласці, паведамляе «Радыё Свабода». Раней мужчына казаў, што падпісаў кантракт, каб зарабіць грошай.
«Максіма Запеку сёння абмянялі. Як і іншых расейскіх палонных, яго перадалі расейскаму боку», – паведамілі ва ўкраінскім праекце «Хачу жыць», створаным для расейскіх вайскоўцаў.
Сярод палонных вайскоўцаў, якіх вызваліла Расея, беларусаў не было.
Як паведаміў раней прэзідэнт Украіны Уладзімір Зяленскі, у выніку абмену дадому вярнуліся 207 украінцаў. Сярод іх шмат абаронцаў Марыупалю, вайскоўцаў, што былі на «Азоўсталі», востраве Змяіным і іншых участках фронту, удакладніў кіраўнік Офісу прэзідэнта Андрэй Ермак.
Мінабароны Расеі абнародавала іншыя лічбы: паводле ведамства, 195 украінскіх вайскоўцаў абмянялі на 195 расейскіх.
Максім Запека, якога сёння аддалі Расеі, трапіў у палон летась у кастрычніку пад Бахмутам у Данецкай вобласці. Мужчына апавядаў, што нарадзіўся ў Светлагорскім раёне на Гомельшчыне, працаваў у Маскве зваршчыкам на дзяржаўным прадпрыемстве. У студзені–сакавіку 2023 года яго выправілі ў знішчаны расейцамі Марыупаль «для ўдзелу ў аднаўленні».
Праз некалькі месяцаў падпісаў кантракт з Мінабароны Расеі. Паводле мужчыны, ён пагадзіўся, каб зарабіць грошай:
«Прыйшла разнарадка, каб мы падпісвалі кантракт. Падпісвалі кантракт у Маскве, у абласным ваенкамаце».
Запека сцвярджаў, што яго падманулі: нібыта абяцалі, што будзе развозіць ежу, а не ваяваць.
Ён таксама казаў, што сваякі кепска паставіліся да яго рашэння ісці ў расейскую армію і што ў Беларусі ягоныя сябры не падтрымоўваюць вайны.
Запека – трэці беларус, які ваяваў на баку акупантаў і трапіў ва ўкраінскі палон. Андрэй Герыловіч і Максім Зязюльчык дасюль застаюцца ва Украіне. Летась яны запісвалі зварот да Лукашэнкі з просьбаю абмяняць іх на палонных беларусаў, якія баранілі Украіну, або на беларускіх палітвязняў.
Сцяпан Кубік belsat.eu
