Байдэн заявіў, што ЗША не будуць перадаваць Украіне амерыканскіх знішчальнікаў F-16
ЗША не будуць перадаваць Украіне самалётаў-знішчальнікаў F-16, заявіў амерыканскі прэзідэнт Джо Байдэн, адказваючы на пытанні журналістаў, паведамляе CNN. Раней пра такую магчымасць казаў украінскі міністр абароны.
На пытанне журналіста пра тое, ці будуць Злучаныя Штаты перадаваць Украіне баявыя самалёты, Джо Байдэн толькі коратка адказаў: «Не». Пры гэтым ён не патлумачыў прычыны свайго адказу.
Пасля прадстаўнік Белага дому Джон Кербі пракаментаваў словы Байдэна. Ён сказаў, што цяпер Украіна атрымлівае вялікую колькасць ваеннай дапамогі, якая будзе адпраўленая ў найбліжэйшыя тыдні і месяцы і якая павінна дапамагчы ЗСУ зімой і вясной.
«Рашэнне пра танкі – і гэта было не толькі рашэнне ЗША, але і немцаў, а да гэтага брытанцаў – насамрэч было зробленае для дапамогі Украіне апярэдзіць баявыя дзеянні, якія, як мы думаем, усе ўбачаць увесну. Такім чынам, гэта быў адзін з тых выпадкаў, калі мы спрабуем спрагназаваць сродкі, якія спатрэбяцца Украіне, калі надвор’е палепшыцца, і мы можам чакаць, што тады расейцы паспрабуюць перайсці ў наступ», – заявіў Джон Кербі.
Раней прэм’ер Польшчы Матэўш Маравецкі заявіў пра гатовасць перадаць ЗСУ амерыканскія знішчальнікі F-16 у каардынацыі з NATO. Прэзідэнт Францыі Эманюэль Макрон таксама дапусціў магчымасць перадаць знішчальнікі Украіне ў рамках ваеннай дапамогі з боку Францыі.
Паводле спікера камандавання Паветраных сілаў Збройных сілаў Украіны Юрыя Ігната, Украіне для абароны трэба замяніць увесь свой парк савецкіх самалётаў на F-16. Акрамя таго, неабходна стварыць з іх сама меней пяць паветраных брыгадаў.
Алена Рувіна belsat.eu
