Днём 29 жніўня ў Чэлябінскай вобласці РФ упаў верталёт Мі-8, які належыць ФСБ. Пра гэта паведаміў губернатар вобласці Аляксей Тэкслер. Увесь экіпаж верталёта загінуў.
Вядома, што верталёт выконваў трэнавальны палёт. Папярэдне, да катастрофы прывяла адмова рухавіка. Таксама паведамляецца, што борт мог зачапіцца за высакавольтныя правады, бо, паводле мясцовых жыхароў, спачатку ён закруціўся ў паветры перад падзеннем.
Спачатку паведамлялася пра чацвярых загінулых, пазней лічба паменшылася да трох. Гэта ўсе чальцы экіпажу, якія былі на борце Мі-8.
«У раёне Чырвонага Поля Сасноўскага раёну Чэлябінскай вобласці пацярпеў катастрофу верталёт Мі-8. Верталёт належаў авіяатраду ФСБ. На месцы працуюць спецыяльныя службы, аказваем ім неабходнае садзейнічанне. Паводле папярэдняй інфармацыі, у выніку падзення верталёта загінулі тры асобы», – паведаміў губернатар вобласці Аляксей Тэкслер.
У МНС Расеі таксама паведамляюць, што на месцы катастрофы знойдзеныя целы траіх чалавек. У выніку падзення верталёта на зямлю мясцовыя жыхары і жылыя будынкі не пацярпелі.
Гэта не першы выпадак падзення паветраных транспартных сродкаў у Расеі за апошні час. Гэтак, 12 жніўня ў Калінінградскай вобласці ўпаў знішчальнік Су-30, экіпаж загінуў. 27 ліпеня ў Алтаі ўпаў верталёт Мі-8, у выніку гэтага загінулі шэсць чалавек. Таксама 17 ліпеня ў горадзе Ейск Краснадарскага краю ў Азоўскае мора ўпаў расейскі штурмавік Су-25, пілот самалёта загінуў. Акрамя гэтага, 4 ліпеня расейскі знішчальнік МіГ-31 пацярпеў катастрофу падчас навучальнага палёту на Камчатцы.
Алена Рувіна belsat.eu
