У Менску працягваецца завочны суд над экс-кандыдатам на прэзідэнта Валерыем Цапкалам. На паседжанні 29 сакавіка адбыліся спрэчкі бакоў, падчас якіх абвінаваўца запатрабаваў асудзіць палітыка на 19 гадоў пазбаўлення волі ва ўмовах калоніі строгага рэжыму і аштрафаваць на 1 тысячу базавых велічыняў, піша «Sputnik».
Былога кандыдата на прэзідэнцтва Валерыя Цапкалу судзяць завочна з 1 сакавіка. Палітыка абвінавачваюць паводле 12 артыкулаў Крымінальнага кодэксу:
- ч. 2 арт. 367 («Паклёп у дачыненні прэзідэнта Беларусі»);
- ч. 2 арт. 368 («Абраза прэзідэнта Беларусі»);
- арт. 369-1 («Дыскрэдытацыя Рэспублікі Беларусь»);
- ч. 3 арт. 361 («Заклікі да мераў абмежавальнага характару» – санкцыяў);
- ч. 1 арт. 361-1 («Стварэнне экстрэмісцкага фармавання альбо ўдзел у ім»);
- ч. 1 арт. 130 («Распальванне сацыяльнай варожасці або няроўнасці»);
- ч. 1 арт. 123 («Прапаганда вайны»);
- ч. 2 арт.361-2 («Фінансаванне экстрэмісцкай дзейнасці»);
- арт. 188 («Паклёп»);
- ч. 2 арт. 424 («Злоўжыванне ўладай або службовымі паўнамоцтвамі»);
- ч. 3 арт. 430 («Атрыманне хабару»);
- ч. 1 арт. 400 («Загадзя ілжывы данос»).
У чэрвені 2022 года ў доме Валерыя Цапкалы правялі ператрус. У доме былі разбітыя вокны, разламаная мэбля, пабіты посуд і раскіданыя рэчы. Палітыка абвесцілі ў вышук.
Падчас спрэчак бакоў пракурор папрасіў суд прызнаць палітыка вінаватым і прызначыць яму 19 гадоў пазбаўлення волі са штрафам на 1000 базавых велічыняў (37 000 рублёў).
Алена Аляксандрава belsat.eu
