Менскі гарадскі суд абвясціў прысуды шасці фігурантам справы па ініцыятыве «Буслы ляцяць». Самы вялікі тэрмін — 15 гадоў зняволення — атрымаў Андрэй Будай, паведамляе праваабарончы цэнтр «Вясна».
Аляксею Гамезу далі 14 гадоў 6 месяцаў, Аляксею Іванісаву — 14 гадоў, Аляксандру Мураўёву — 12 гадоў, Мікалаю Біблісу — 8 гадоў 6 месяцаў, Аляксандру Сідарэнку — 8 гадоў калоніі.
Такія тэрміны прызначыла суддзя Анастасія Папко. Па яе рашэнні абвінавачаных адправяць у калоніі ўзмоцненага рэжыму. Чатыром фігурантам яна выпісала яшчэ і штрафы памерам 300 і 500 базавых велічынь.
У лістападзе 2021 года Вярхоўны суд прызнаў аб’яднанне «Супраціў», у якое ўваходзяць групоўкі «Кібер-партызаны», «Дружина народной самообороны – ДНС» і «Буслы ляцяць», тэрарыстычным. У залежнасці ад ролі кожнага ў розным спалучэнні іх абвінавачваюць ва ўдзеле ў акцыях пратэсту; пашкоджанні машыны суддзі Барысаўскага раёна і шын аўтамабіля актывіста-карэспандэнта неназванага рэспубліканскага СМІ; кіданні камянёў у вокны кватэры менскага пракурора і праўладнай актывісткі; знішчэнне сістэмы відэаназірання ў Фрунзенскім раёне Менска.
Акрамя таго, Іванісаў, Гамеза, Будай і Мураўёў унесены у «тэрарыстычны спіс» КДБ. Праваабаронцы прызналі Іванісава і Гамезу палітзняволенымі.
Сяргей Крот belsat.eu