Памер рэальных пенсіяў у Беларусі ў лістападзе знізіўся на 0,7% у параўнанні з кастрычнікам. Таксама скарацілася сярэдняя пенсія за год, паведамляе Zerkalo.io са спасылкай на Белстат.
Сярэдняя прызначаная пенсія ў лістападзе 2023 года склала 693 рублі. Гэта на 0,4 рублі менш, чым у кастрычніку.
На 0,7% упалі рэальныя пенсіі ў месячным выражэнні. У кастрычніку рэальныя пенсіі таксама падалі ў дачыненні да верасня. Раслі пенсійныя выплаты сёлета толькі ў траўні, жніўні і верасні. У астатнія месяцы – падалі. Найбольш – на 1,2% – у лютым.
У траўні і верасні падымаўся памер пенсіяў – кожны раз у сярэднім на 5%. Планавалася, што да канца года будзе яшчэ адно падвышэнне, аднак яго адмянялі. У 2024 годзе беларускія ўлады абяцаюць падвысіць пенсіі на 15%.
У Беларусі пенсію атрымліваюць 2,3 мільёны грамадзянаў.
Марыя Міхалевіч belsat.eu
