Літва выступіла за ўзмацненне NATO ў Балтыі пасля заяваў РФ пра ядравую зброю для Беларусі
Кіраўнік МЗС Літвы заявіў пра неабходнасць скіраваць у краіны Балтыі дадатковыя сілы NATO. «Гэта будзе сігнал салідарнасці і рашучасці», – напісаў Габрыелюс Ландсбергіс у Twitter.
Міністр замежных справаў Літвы заклікаў скіраваць у краіны Балтыі, што мяжуюць з Беларуссю і Расеяй, дадатковыя войскі NATO. Габрыелюс Ландсбергіс напісаў пра гэта ў сваім Twitter:
«Расея дэманструе слабасць, а не моц. Наш адказ мусіць быць моцным, а не слабым. Сур’ёзныя санкцыі, разгортванне войскаў у Балтыі ды павелічэнне колькасці сістэмаў паветранай і марской абароны на ўсходнім флангу NATO стане сігналам салідарнасці і рашучасці, а не страху і ўхілістасці».
Раней МЗС Літвы апублікавала на сваім сайце заяву з нагоды планаў «двух непрадказальных дыктатарскіх рэжымаў» размясціць у Беларусі расейскую ядравую зброю:
«Гэта адчайныя крокі Пуціна і Лукашэнкі, скіраваныя на стварэнне новай хвалі напружанасці і дэстабілізацыі ў Еўропе. Беларусь, якая ўсё больш губляе свой суверэнітэт, падтрымлівае расейскую агрэсію і дапамагае ёй ды больш шчыльна інтэгруецца ў ваенныя планы Расеі, – гэта дадатковы фактар рызыкі для Балтыйскага рэгіёну».
У ведамстве таксама заявілі, што размяшчэнне ў Беларусі расейскай тактычнай ядравай зброі яшчэ больш уцягвае афіцыйны Менск у вайну з Украінай ды ў канфрантацыю з дэмакратычным светам і што Літва будзе заклікаць да новых санкцыяў.
25 сакавіка прэзідэнт Расеі сказаў, што да ліпеня ў Беларусі скончыцца будаўніцтва адмысловага сховішча. Тады можна будзе паставіць ядравую зброю.
Сяргей Крот belsat.eu
