Беларуску Ірыну Слюсар змыла марскою хваляю 22 лютага ў грузінскім горадзе Кабулеці, калі жанчына спрабавала ўратаваць свайго сабаку. Пошукі працягваліся чатыры дні.
«Са шкадаваннем паведамляем, што Ірыну знайшлі загінулай. Пошукі завершаныя, аднак мы не можам выдаваць падрабязнасцяў. Мы глыбока шкадуем аб тым, што адбылося, і выказваем спачуванні родным і блізкім. Дзякуй за вашу дапамогу ў пошуках!» – напісалі арганізатары пошуку беларускі.
Вядома, што 33-гадовая Ірына Слюсар з сяброўкаю спрабавала выцягнуць з вады сабаку: Ірыну накрыла хваляй і змыла ў мора. Другую беларуску, Юлію, выкінула на бераг, са страсеннем мозга яе даставілі ў шпіталь.
Мясцовыя ратавальнікі і паліцыянты былі ў курсе таго, што адбылося, яны выязджалі на месца надзвычайнага здарэння і абследавалі берагавую лінію.
Ірына Слюсар – рэжысёрка, нарадзілася ў Жодзіне і скончыла Беларускую дзяржаўную акадэмію мастацтваў. У Грузіі разам са знаёмымі заснавала дзіцячы тэатр лялек «Лось і светлячок».
У канцы ліпеня мінулага года беларуса Андрэя Корсака таксама змыла морам у Батумі, праз чатыры дні пошукаў знайшлі цела мужчыны.
Алена Рувіна belsat.eu
