Баевікі расейскай ПВК Вагнэра працягваюць «працу на афрыканскім і беларускім кірунках», паведаміў 25 верасня блізкі да наймітаў тэлеграм-канал. А пазней гэтую інфармацыю паўтарыў і афіцыйны канал наймітаў.
«ПВК Вагнэра не спыняла і працягвае сваю працу на афрыканскім і беларускім кірунках. Ні пра якое закрыццё кампаніі не вядзецца. Камандаванне ПВК усё гэтак жа вырашае ўсе пастаўленыя задачы і кіруе кампаніяй», – гаворыцца ў паведамленнях.
Там таксама папрасілі «не верыць чуткам і плёткам і давяраць інфармацыі толькі з афіцыйных каналаў кампаніі».
Тры месяцы таму ў Расеі адбыўся мяцеж ПВК Вагнэра, падчас якога найміты Яўгенія Прыгожына ледзь не дайшлі да Масквы. Тыя падзеі пацягнулі за сабою перадыслакацыю вагнэраўцаў у Беларусь і эскалацыю напружання на мяжы з краінамі NATO. Аднак са жніўня прысутнасць наймітаў у Беларусі пачала паступова скарачацца.
Спікер Дзяржаўнай памежнай службы Украіны Андрэй Дэмчанка 24 верасня заявіў са спасылкаю на звесткі выведкі, што цяпер у Беларусі застаюцца каля 1000 вагнэраўцаў (у канцы жніўня ён ацэньваў групоўку наймітаў на беларускай тэрыторыі на 5000).
Якуб Хруст belsat.eu