Міністэрства юстыцыі Беларусі яшчэ ў траўні прызнала ГА «Белая Русь» суб’ектам грамадзянскай супольнасці, які мае права на ўзаемадзеянне з дзяржаўнымі органамі і арганізацыямі. Цяпер арганізацыя змяняе статут, каб вылучаць кандыдатаў для ўдзелу ва Усебеларускім народным сходзе.
У чацвер, 24 жніўня, у Менску прайшло паседжанне рэспубліканскай рады «Белай Русі», падчас якога абмяркоўвалася новая рэдакцыя статуту і парадак вылучэння кандыдатаў на УНС. Старшыня арганізацыі Алег Раманаў распавёў, што цяпер вядзецца праца для фармавання квотаў ад рэгіёнаў, прадумваюцца спісы кандыдатураў.
Да 1 верасня зменены статут накіруюць у Міністэрства юстыцыі для рэгістрацыі.
Алег Раманаў падкрэсліў, што Беларусь уступае ў вельмі важны перыяд электаральнай кампаніі.
«У гэтым палітычным годзе нам трэба сфармаваць Усебеларускі народны сход. Рэспубліканскае грамадскае аб’яднанне – адзін з суб’ектаў гэтага працэсу. Менавіта гэтае пытанне будзе ў цэнтры нашай увагі», – сказаў старшыня «Белай Русі».
Рэспубліканская рада арганізацыі таксама прыняла рашэнне аб правядзенні з 5 да 15 верасня грамадска-палітычнага марафону «17 граняў адзінства». Дыялогавыя пляцоўкі плануюцца ў 17 гарадах Беларусі.
Праўладнае грамадскае аб’яднанне «Белая Русь» было створанае ў 2007 годзе. 18 сакавіка 2023 года яно было зарэгістраванае як партыя, якая падтрымлівае Лукашэнку і фінансуецца з дзяржаўнага бюджэту.
Марыя Міхалевіч belsat.eu