25 траўня не стала Вольгі Завадскай, маці зніклага 22 гады таму журналіста Дзмітрыя Завадскага.
У 2016 годзе ў жанчыны знайшлі рак малочнай залозы, апошні год яна была прыкаваная да пасцелі – яе перасталі слухацца ногі і рукі. За Вольгай даглядалі дачка і муж.
Дзмітрый Завадскі быў аператарам у журналісцкім пуле Аляксандра Лукашэнкі, але пазней сышоў з пула і стаў супрацоўнічаць з ОРТ.
Знік Дзмітрый Завадскі 7 ліпеня 2000 года ў менскім аэрапорце. У яго выкраданні абвінавацілі двух афіцэраў МУС – Валерыя Ігнатовіча і Дзмітрыя Маліка. Кожнаму з іх за гэта прысудзілі па 10 гадоў пазбаўлення волі. Але афіцэры не прызналі сваёй віны, а факт забойства даказаны не быў.
Паводле іншай версіі, да знікнення Дзмітрыя Завадскага датычныя тыя ж асобы, хто займаўся выкраданнем Юрыя Захаранкі, Віктара Ганчара і Анатоля Красоўскага.
Цела Дзмітрыя так і не знайшлі, ён быў прызнаны памерлым.
Раман Шавель belsat.eu
