Прэзідэнт Уладзімір Зяленскі заявіў, што Украіна страціла за час поўнамаштабнай вайны з Расеяй 31 тысячу вайскоўцаў.
«31 тысяча ўкраінскіх вайскоўцаў загінула ў гэтай вайне. Не 300, не 150, як там брэша Пуцін. Тым не менш – гэта вялікія страты для нас», – заявіў Зяленскі падчас прэс-канферэнцыі, прымеркаванай да другой гадавіны вайны.
Паводле ўкраінскага прэзідэнта, расейцы за два гады вайны страцілі 180 тысяч загінулымі, а разам з параненымі страты дасягаюць 500 тысяч. Лічбу параненых з боку Украіны Зяленскі не назваў.
Зяленскі таксама выказаўся і пра страты сярод мірнага насельніцтва. Паводле прэзідэнта, на часова акупаваных тэрыторыях загінулі дзясяткі тысяч цывільных. Ён дадаў, што не ведае, колькі з іх загінулі ў выніку баявых дзеянняў, а колькі проста былі забіты і закатаваныя акупантамі.
«Мы не ведаем, колькі яны забілі нашых цывільных», – прызнаў ён.
Улады Украіны агучылі страты ўкраінскага войска ў вайне з Расеяй упершыню са снежня 2022 году: тады дарадца кіраўніка Офісу прэзідэнта Міхайла Падаляк паведаміў, што загінулі ад 10 да 12,5–13 тысяч вайскоўцаў.
Глеб Нержын belsat.eu
