Прэм’ер-міністр Раман Галоўчанка ў эфіры беларускага тэлебачання заявіў, што дзяржава можа адмовіцца ад рэгулявання цэнаў, калі «інфляцыя прыйдзе ў норму». На ягонае меркаванне, улады не вінаватыя ў высокай інфляцыі ў Беларусі.
Раман Галоўчанка даў інтэрвʼю беларускаму дзяржаўнаму тэлеканалу і распавёў пра рэгулявання коштаў. Ён назваў гэтыя захады «дастаткова неардынарнымі».
«У сусветнай практыцы рэдка прымаюцца такога роду комплексныя пастановы аб рэгуляванні цэнаў. Магчыма, калі інфляцыя прыйдзе ў норму, мы вернемся да гэтага пытання», – сказаў кіраўнік ураду.
Ён адзначыў, што цяпер эксперты працуюць над «кропкавымі карэкціроўкамі па некаторых аспектах».
Таксама Галоўчанка не ўбачыў віны ўладаў у высокай інфляцыі ў Беларусі (паводле Белстату, за 11 месяцаў сёлета – 15,4% год да года).
«Упэўнены: калі б не вонкавая сітуацыя, мы былі б у межах устаноўленых параметраў. Унутраныя фактары не адыгрываюць істотнай ролі ў інфляцыі: макраэканоміка збалансаваная, валютны рынак збалансаваны, курс беларускага рубля цягам года ўмацоўваўся ў адносінах да кошыка валют. Усё гэта інфляцыя, што імпартуецца», – заявіў прэмʼер.
Ён сказаў, што трэці месяц запар у Беларусі адзначаецца дэфляцыя. Па выніках года будзе каля 12 – 13%, мяркуе чыноўнік.
Сяргей Крот belsat.eu
