Магілёўская пракуратура правяла праверкі і выявіла парушэнні заканадаўства ў пенітэнцыярнай сістэме пры прыцягненні да працы асуджаных. З пачатку года нават вядомы адзін выпадак, калі чалавек загінуў на вытворчасці. Пра гэта паведаміў намеснік пракурора Магілёўскай вобласці Андрэй Волкаў падчас нарады ўпраўлення Дэпартаменту выканання пакаранняў МУС.
Пракуроры правялі праверку і выявілі, што асуджаных прыцягвалі да прымусовай працы на прадпрыемствах з парушэннем заканадаўства, «што недапушчальна», заявіў Андрэй Волкаў.
Таксама падчас праверкі высветлілася, што за першае паўгоддзе 2023 года на прадпрыемствах адбылося 17 выпадкаў вытворчага траўматызму з удзелам асуджаных, адзін зняволены пры гэтым загінуў. У першым паўгоддзі 2022 года выпадкаў траўм было ўсяго шэсць.
Акрамя таго, намеснік пракурора Магілёўскай вобласці прызнаў праблему, што з асуджанымі не заўсёды праводзіўся інструктаж па ахове працы, а таксама не выдавалася спецыяльнае адзенне і сродкі індывідуальнай абароны. Аднак няма ніякіх дадзеных аб тым, што праз гэтыя парушэнні ў дачыненні да вінаватых супрацоўнікаў Дэпартаменту выканання пакаранняў былі ўжытыя якія-небудзь спагнанні.
Працу вязняў у Беларусі выкарыстоўваюць на вытворчасці адзення, мэблі, будаўнічых і гаспадарчых тавараў, спартовых трэнажораў і камплектавальных для буйной прамысловасці. На базе папраўчых калоніяў арганізаваныя дзяржаўныя прадпрыемствы (звычайна іх назвы адпавядаюць нумару калоніі), якія падпарадкоўваюцца Дэпартаменту выканання пакаранняў МУС.
Алена Рувіна belsat.eu