Ва Украіне сёння распачаўся продаж новай маркі з серыі «Расейскі ваенны карабель, ідзі *****». Другая марка выклікала аграмадны ажыятаж. Чэргі ахвотных здабыць гістарычную марку фактычна заблакавалі працу ўстановы. Дзень старту продажаў быў прымеркаваны да 40-а дзён з моманту затаплення крэйсера «Масква».
Аркуш з маркамі ўтрымлівае тры паштовых маркі і тры купоны. На купонах выяўлена выява першай паштовай маркі «Расейскі ваенны карабель, ідзі…», якая дазваляе ў дынаміцы прасачыць гісторыю расейскага крэйсера «Масква» і яго сумнавядомы фінал.
Апроч таго, на марках, акрамя назвы выпуску, у жалобнай рамцы зафіксавана дата 14.04.2022 – «чорны дзень у гісторыі расейскага флоту».
Старт продажаў быў прызначаны на 14-ую гадзіну паводле Кіеўскага часу. Але задоўга меркаванага пачатку людзі выстраіліся ў вялізарныя чэргі і фактычна заблакавалі дзейнасць «Укрпошты».
Урачыстае спецпагашэнне паштовых марак «Расейскі ваенны карабель… УСЁ!» у Кіеве адбылося з удзелам прэзідэнта Украіны Уладзіміра Зяленскага, камандуючага ВМС ЗС Украіны контр-адмірала Аляксея Неежпапы і генеральнага дырэктара «Укрпошты» Ігара Смялянскага.
«Такія рэчы, як гэтая марка, – гэта перш за ўсё сімвалы, якія дапамагаюць нам верыць у нашу перамогу. Што мы абавязкова пераможам у гэтай вайне, а акупант пойдзе на дно. Цікавасць людзей да гэтых марак таму пацвярджэнне. Перакананы, што такіх сімвалаў перамогі ў нас будзе яшчэ шмат», – перадае словы Зяленскага сайт «Укрпошты»
Агульны наклад паштовых марак «Рускі ваенны карабель… УСЁ!» – 5 млн асобнікаў. У дадатак, да паштовых марак выпушчаны канверт «Першы дзень», немаркіраваны мастацкі канверт і паштовая картка. Аўтар малюнка марак, канвертаў і карты – Барыс Грох.
Кошт аркуша – 69 грн і $ 4, 5 адпаведна.
Раман Лугоўскі belsat.eu