Прэмʼер-міністр Польшчы Дональд Туск прыбыў у сталіцу Украіны 22 студзеня. Ён ужо сустрэўся з украінскім прэмʼер-міністрам Дзянісам Шмыгалем, запланаваная таксама сустрэча з прэзідэнтам Украіны Уладзімірам Зяленскім. Падчас свайго візіту Дональд Туск заявіў, што цяпер няма нічога важнейшага за ваенную дапамогу Украіне. Пра гэта паведамляе прэс-служба Канцылярыі Дональда Туска.
Падчас кароткай сустрэчы з журналістамі прэмʼер Польшчы падкрэсліў, што ён імкнецца сфармаваць адчуванне таго, што сусед Украіны – яе самы надзейны і стабільны саюзнік.
«Сюды, у Кіеў, я прыехаў і дзеля польскай бяспекі, – адзначыў Дональд Туск. – Гэта не справа выключна Украіны, гэта справа бяспекі ўсяго свабоднага свету, а Польшчы – асабліва, з увагі на геаграфічнае становішча. Ёсць пра што пагаварыць, але важна, каб мы ўсе мелі перакананне, што размову вядуць сябры, якія ўмеюць развязваць спрэчныя праблемы, бо вядома, што яны ёсць».
Прэм’ер-міністр дадаў, што ягоны візіт таксама закліканы мабілізаваць Захад для большай дапамогі Украіне. Паводле Туска, Польшча будзе ўсяляк дапамагаць Украіне і падтрымліваць яе «ў гэтай смяротнай сутычцы са злом».
«Няма нічога важнейшага за падтрыманне Украіны ў яе ваенных намаганнях супраць нападу Расеі. Гэта бясспрэчна справа нумар адзін», – падкрэсліў Дональд Туск.
Адзначым, што гэта першы візіт Дональда Туска ва Украіну пасля прызначэння на пасаду кіраўніка польскага ўраду.
Ася Саковіч belsat.eu