Міністр замежных справаў Сяргей Алейнік у эфіры тэлеканалу СТВ расказаў пра турыстычную прывабнасць афрыканскага кантыненту для Беларусі.
«Гэта вельмі перспектыўны кірунак, і з шэрагам афрыканскіх краінаў у нас нават падпісаныя міжурадавыя пагадненні аб супрацы ў галіне турызму, – сказаў Сяргей Алейнік. – Гэта тая сфера, якую мы будзем развіваць і культываваць, прычым у абодвух кірунках».
Паводле чыноўніка, з міністрам замежных справаў Егіпту абмяркоўвалася пытанне пра павелічэнне колькасці рэйсаў, каб большая колькасць грамадзянаў абедзвюх краінаў магла падарожнічаць.
Сяргей Алейнік падкрэсліў, што Афрыка дынамічна развіваецца і ёсць шмат цікавых месцаў для наведвання:
«Я думаю, з шмат якімі афрыканскімі краінамі ў нас вельмі добрыя перспектывы менавіта ў развіцці сферы турызму».
Нагадаем: на мінулым тыдні Сяргей Алейнік наведаў Уганду, дзе браў удзел у саміце Руху недалучэння. Як паведамляюць праўладныя СМІ, там міністр сустрэўся з прадстаўнікамі Эрытрэі, Мазамбіку, Экватарыяльнай Гвінеі, Зімбабвэ.
Ася Саковіч belsat.eu