Украіна паспяхова мардуе ворага падчас абароны Бахмуту, перашкаджаючы яму весці наступальныя дзеянні на іншых частках фронту, кажуць аналітыкі амерыканскага Інстытуту вывучэння вайны (ISW). Аднак ЗСУ маглі б дзеяць яшчэ больш эфектыўна, калі б перадача ўзбраення ад краінаў Захаду была больш аператыўнай.
Аналітыкі амерыканскага Інстытуту вывучэння вайны (ISW) лічаць абарону ўкраінцамі Бахмуту стратэгічна абгрунтаванай аперацыяй, нягледзячы на яе кошт для краіны. Але Украіна таксама заплаціла б значную цану, калі б дазволіла расейскім войскам лёгка ўзяць Бахмут.
«Калі б УС РФ узялі яго адносна хутка і невялікай цаной, яны маглі б спадзявацца на пашырэнне аперацыяў так, што Украіне прыйшлося б паспешна будаваць абарончыя пазіцыі на менш спрыяльнай мясцовасці», – растлумачылі ў ISW.
Улічваюць эксперты і палітычны момант, звязаны з тым, як адыход з гораду можа быць успрыняты грамадскасцю.
ЗСУ ўжо выкарыстоўвалі аналагічную мадэль паступовага знясілення суперніка, прымушаючы расейскіх вайскоўцаў некалькі месяцаў несці вялікія страты ў асабовым складзе і тэхніцы дзеля малаважных тактычных поспехаў. У пачатку лета 2022 года расейскія войскі месяцамі спрабавалі прарваць эфектыўную ўкраінскую абарону ў Севераданецку і Лісічанску ды захапілі Лісічанск толькі пасля кантраляванага адыходу ўкраінцаў з гэтых мясцінаў. Аднак неўзабаве высветлілася, што захоп Лісічанску не прынёс расейскім вайскоўцам аператыўных поспехаў, а расейскі наступ у гэтым раёне фактычна захлынуўся.
Украінская абарона Бахмуту, відаць, будзе спрыяць аналагічнаму выніку – расейскія сілы перакідваюць у гэты раён вайскоўцаў і тэхніку з траўня 2022 года, але пакуль не дабіліся якіх-небудзь значных поспехаў у аператыўных адносінах. Цяпер, паводле ацэнак ISW, ЗСУ фактычна ўтрымліваюць расейскія войскі і тэхніку каля Бахмуту, прыцягваючы туды ж усю ўвагу расейскага камандавання.
Раней амерыканскі чыноўнік з Белага дому заявіў журналістам, што Украіне трэба засяродзіцца на рыхтаванні да вясновага контрнаступлення, а не на абароне Бахмуту любой цаной.
Алена Рувіна belsat.eu
