Следчы камітэт Беларусі паведаміў, што завяршыў расследаванне справы супраць заснавальніка NEXTA Сцяпана Пуцілы. «Спецыяльнае вядзенне» пачалося 8 снежня. Такім чынам, на следства ведамству хапіла 12 дзён, хаця ў справе – 13 пунктаў абвінавачання паводле 11 артыкулаў.
СК Беларусі завяршыў следства супраць заснавальніка NEXTA Сцяпана Пуцілы і блогера Яна Рудзіка. Ведамства называе іх «кіраўнікамі тэрарыстычнай арганізацыі». Справу ўжо накіравалі генеральнаму пракурору для перадачы ў суд.
Пуцілу абвінавачваюць паводле 13 пунктаў 11 крымінальных артыкулаў, Рудзіка – паводле 12 пунктаў 10 артыкулаў. На расследаванне ўсіх «злачынстваў» следчым хапіла 12 дзён. Пра пачатак «спецыяльнага вядзення» СК паведамляў 8 снежня.
Працэдуру «спецыяльнага вядзення» улады прыдумалі для правядзення завочных судоў над асобамі, якіх вінавацяць паводле «экстрэмісцкіх» артыкулаў і якія цяпер за межамі Беларусі. Асуджаных маюць пазбаўляць грамадзянства і канфіскоўваць у іх маёмасць.
Сяргей Крот belsat.eu