Нягледзячы на актыўнасць расейскіх і беларускіх вайскоўцаў, Збройныя сілы Украіны і эксперты пакуль не бачаць фармавання наступальных груповак на тэрыторыі Беларусі. Глядзім, што адбылося з пачатку месяца – і колькі той тэхнікі.
Афіцыйных лічбаў пра тое, колькі тэхнікі вязуць бліжэй да беларуска-ўкраінскай мяжы, не называлі, дакладнай інфармацыі няма. Але падобна, вядзецца пра дзясяткі адзінак.
За перасоўваннямі вайсковай тэхнікі па Беларусі сочыць праект «Беларускі Гаюн», а таксама «Супольнасць чыгуначнікаў Беларусі». 19 і 20 снежня яны заўважылі тры эшалоны з расейскай вайсковай тэхнікай.
Першы ішоў з-пад Лепелю на Асіповічы (і, як стала вядома пазней, дайшоў да Палонкі, што пад Баранавічамі), вёз, паводле ўдакладненых звестак, 31 расейскі танк, 13 грузавікоў «Урал», адзін бронетранспарцёр і адну інжынерную гусенічную машыну, а таксама сотню вайскоўцаў Узброеных сілаў Расеі. Другі ішоў з-пад Баранавічаў праз Берасце на Лунінец, вёз 23 расейскія танкі, 8 бензавозаў, 9 грузавікоў, 2 пасажырскія і 7 грузавых вагонаў. Трэці – са Шклова прыйшоў у Калінкавічы (можа паехаць далей на поўдзень), вёз 20 расейскіх бронемашынаў, 7 грузавікоў.
Рух тэхнікі заўважалі і да таго. Напрыклад, 12 і 14 снежня заўважылі два эшалоны расейскай тэхнікі, якія прыбылі з Расеі на станцыю Палонка пад Баранавічамі, кожны вёз пару дзясяткаў «Уралаў», а другі вёз прынамсі 4 бронемашыны і некалькі бензавозаў. У тым жа напрамку раней у снежні перасоўвалі 24 адзінкі расейскай тэхнікі, у тым ліку танкі і мінамёты.
Акрамя таго, расейскую вайсковую тэхніку і вайскоўцаў бачаць і ў іншых месцах на поўдні Беларусі: у Берасці, Мазыры і Гомлі. Не кажучы ўжо пра гарады ў цэнтры і на поўначы Беларусі, аж да Полацкага раёну.
Таксама не спыняецца рух беларускай вайсковай тэхнікі. Напрыклад, у снежні з Берасця на Маларыту ішла дэсантна-штурмавая брыгада, з Віцебску на Берасце ішла брыгада Сілаў спецыяльных аперацыяў… Але ішлі і ў зваротным кірунку: з-пад Слоніму за Горадню.
«Беларускі Гаюн» лічыць, што такая колькасць тэхнікі, якую цяпер перакідваюць на памежжа, невялікая і дакладна не дастатковая для наступальных дзеянняў.
Так жа лічыць і Генеральны штаб Збройных сілаў Украіны: актыўнасць ля беларуска-ўкраінскай мяжы бачаць (і ведаюць, што адпрацоўваюцца наступальныя дзеянні), але пішуць, што «фармавання наступальных груповак не выяўлена». Ды камандаванне Аб’яднаных сілаў ЗСУ лічыць, што патэнцыялу «дастаткова для стварэння пагрозы Украіне і правядзення тактычных дзеянняў».
Амерыканскі Інстытут вывучэння вайны (ISW) ацэньвае сітуацыю так: індыкатары сведчаць у падтрымку прагнозу аб найбольш небяспечным курсе дзеянняў у будучыні, але менавіта цяпер найгоршы варыянт малаімаверны, а новае расейскае ўварванне з тэрыторыі Беларусі наўрад ці непазбежнае.
Нават калі лічыць, што «Гаюн» і чыгуначнікі бачаць толькі палову руху тэхнікі, усё роўна выглядае, што для наступу, які быў у пачатку поўнамаштабнай вайны ва Украіне, яе недастаткова. Тады лік тых жа танкаў вёўся не на дзясяткі, а на сотні.
Перад пачаткам таго наступу на межах Украіны бачылі больш за тысячу танкаў, а ЗСУ і Тэрытарыяльная абарона Украіны хваліліся, што за адзін дзень каля аднаго мястэчка знішчылі пад сотню расейскіх танкаў. Толькі за ўчора ЗСУ заявілі аб знішчэнні сярод іншага 7 расейскіх танкаў, столькі ж – за пазаўчора, а цяпер Расея не вядзе актыўнага наступу.
Афіцыйна гэта ўсё – планавыя вучэнні (якія пачаліся пасля першага за снежань прылёту расейскага міністра абароны ў Беларусь), раптоўная праверка боегатовасці (якую абвясцілі 13 снежня і завяршылі ў дзень прылёту Уладзіміра Пуціна і «дэсанту» расейскіх чыноўнікаў, у тым ліку міністра абароны) і падрыхтоўка расейскіх мабілізаваных. Агулам жа беларуска-расейскія вучэнні, якія пачаліся ў лютым як прыкрыцце для нападу, афіцыйна працягвалі ўжо 34 разы, цяпер яны працягнутыя прынамсі да 26 снежня.
Вучэнні праходзяць у тым ліку на палігоне «Берасцейскі» пад самай мяжой з Польшчай і блізу мяжы з Украінай. Беларускія і расейскія вайскоўцы ладзяць супольныя заняткі, праводзяць баявое зладжванне. Пры тым на вучэннях у Беларусі чамусьці вешалі на бранятэхніку сцяг баевікоў так званай ДНР. Але «Гаюн» заўважае, што беларускія вайскоўцы падчас раптоўнай праверкі пазбягалі палігонаў, на якіх застаюцца расейскія мабілізаваныя.
Аляксандр Лукашэнка і ягоны міністр абароны кажуць, што гэта «стрымліванне імавернага праціўніка ад ужывання ваеннай сілы супраць Беларусі», бо блізу беларускай мяжы Украіна, маўляў, ладзіць правакацыі і хоча ўцягнуць NATO ў канфлікт, а апазіцыя нібыта заклікае да гвалтоўнага захопу ўлады і ўчынення тэрактаў. Міністр абароны Беларусі запэўнівае, што гэта ўсё патрэбна Злучаным Штатам.
«Беларускі Гаюн» нядаўна разглядае два сцэнары: або будзе новы расейскі наступ з тэрыторыі Беларусі з удзелам ці без удзелу беларускіх войскаў, або «рэгіянальная групоўка войскаў», якую разгортваюць ужо больш за два месяцы, проста застанецца ў Беларусі на нявызначаны тэрмін.
Які сцэнар спраўдзіцца, прадказаць цяжка. З аднаго боку, пакуль войскаў ля ўкраінскай мяжы параўнальна мала. З другога боку, беларускія вайскоўцы трэнуюцца будаваць пантонна-маставыя пераправы і засвойваюць выведныя і ўдарныя беспілотнікі, у Беларусь таемна ездзяць расейскія генералы, а Пуцін і Лукашэнка на асабістых сустрэчах пазбягаюць публічнага абмеркавання вайны.
***
Расея яшчэ ў жніўні спыніла запускі ракет па Украіне з тэрыторыі Беларусі і беларускага неба. Але ў беларускім небе перыядычна лётаюць расейскія самалёты: МіГ-31К и А-50, якія, як мяркуецца, удакладняюць цэлі для расейскіх удараў па Украіне, і штурмавікі Су-25, якія могуць несці ядравую зброю, але пакуль не нясуць, калі верыць афіцыйным заявам.
Алесь Наваборскі belsat.eu