Дар’ю Лосік не выпусцілі 21 кастрычніка з-пад варты, калі мінула 72 гадзіны пасля затрымання. Яна застаецца ў СІЗА Берасця. Аб гэтым паведамляе радыё «Свабода».
Дар’ю Лосік, жонку палітвязня і журналіста «Свабоды» Ігара Лосіка, затрымалі 18 кастрычніка. Сілавікі прыйшлі дадому да Лосікаў а 8-й раніцы, сама Дар’я з двухгадовай дачкой Паўлінай яшчэ спала. Паводле паведамленняў праўладных тэлеграм-каналаў, Дар’ю абвінавачваюць у садзейнічанні экстрэмісцкай дзейнасці ў выглядзе размовы з тэлеканалам «Белсат» вясной 2022 года.
Паводле якога артыкулу абвінавачваюць жонку палітвязня, афіцыйна не паведамляецца. Дачка цяпер застаецца ў бабулі з дзядулем, бацькоў Дар’і.
Ігара Лосіка затрымалі 25 чэрвеня 2020 года. 14 снежня 2020-га яго засудзілі на 15 гадоў зняволення за нібыта арганізацыю масавых закалотаў і распальванне варожасці. КДБ залучыў Лосіка ў спіс асобаў, якія маюць дачыненне да тэрарыстычнай дзейнасці.
Цяпер Ігар у папраўчай калоніі № 1 у Наваполацку, куды быў этапаваны ў чэрвені, яго прызналі палітычным вязнем.
Антон Тачняк belsat.eu
