За два месяцы з расейскіх калоній выбыла каля 23 тыс зняволеных. Гэта адбывацца на фоне вярбоўкі ў «ЧВК Вагнера»
У верасні і кастрычніку 2022 года колькасць зняволеных у расейскіх папраўчых калоніях агульнага і строгага рэжымаў скарацілася на рэкордныя 23 тысячы чалавек, вынікае з дадзеных ФСВП, якія прааналізавала «Медиазона».
Так, за верасень 2022 года колькасць зняволеных скарацілася амаль на 10 тысяч чалавек, за кастрычнік – на 13 тысяч чалавек.
Выданне паведамляе, што скарачэнне колькасці зняволеных адбываецца на фоне іх вярбоўкі для ўдзелу ў вайне ва Украіне ў атрадах «ЧВК Вагнера». Яго заснавальнік Яўген Прыгожын актыўна заняўся вярбоўкай зняволеных на вайну, абяцаючы ім узамен памілаванне, хаця гэтая працэдура павінна праходзіць праз прэзідэнцкі ўказ.
Як адзначае «Медиазона», за час вайны публічна такіх указаў не з’яўлялася. Пры гэтым, па словах некаторых зняволеных, тых, хто згаджаецца на здзелку, этапуюць у калоніі Растоўскай вобласці, але як афармляюцца гэтыя перамяшчэнні зняволеных, як і іх гібель на вайне – невядома.
Паводле ацэнкі кіраўніка праваабарончай арганізацыі «Русь сидящая» Вольгі Раманавай, да канца кастрычніка ў калоніях маглі завербаваць ужо больш за 20 тысяч зняволеных, а да сярэдзіны лістапада гэтая лічба магла дасягнуць 30–35 тысяч чалавек.
Журналісты зазначаюць, што з 2010 года такога рэзкага правалу ў ліку зняволеных не было. Маштабныя скарачэнні параўнальныя толькі з буйной амністыяй 2015 года, калі за два месяцы колькасць зняволеных зменшылася на 15 тысяч чалавек, і з каронавірусным перыядам, калі суды сталі выносіць менш прысудаў.
Алена Рувіна belsat.eu
