Беларуская хакерская групоўка «Кіберпартызаны» паведамляе аб узломе сайта Галоўнага радыёчастотнага цэнтру (ГРЧЦ), які выконвае кантрольна-наглядныя і рэгулятарныя функцыі «Раскамнагляду» – расейскага цэнзара ў інтэрнэце і які, у прыватнасці, блакуе антываенныя рэсурсы.
Хакеры паведамляюць, што з пачатку вайны ва Украіне ГРЧЦ сочыць за праціўнікамі пуцінскага рэжыму ў інтэрнэце, даносіць у ФСБ і расейскую пракуратуру аб непажаданых рэсурсах і спрабуе дабіцца іх блакіроўкі.
У выніку хакерскага нападу было зроблена наступнае:
- узламана ўнутраная сетка ГРЧЦ;
- выпампаваны дакументы, перапіскі і пошты супрацоўнікаў, сістэмы сачэння за імі (+2TB);
- зашыфраваны працоўныя станцыі;
- пашкоджаны дамен кантролер.
Таксама «Кіберпартызаны» завалодалі вялікай колькасцю матэрыялаў, якія даказваюць маштабнае сачэнне ў інтэрнэце і спробы ўстанавіць татальны кантроль за ўсімі, хто за апошнія 20 гадоў выказваўся супраць пуцінскага рэжыму.
Паведамляецца, што па гэтых матэрыялах будуць апублікаваны расследаванні. «Мы выпусцім свае расследаванні і перададзім матэрыялы журналістам», – заяўляюць хакеры.
Алена Рувіна belsat.eu
