Народная артыстка СССР Ала Пугачова ў сваім акаўнце ў Instagram апублікавала пост, у якім просіць залічыць яе ў спіс «замежных агентаў» Расеі ўслед за ейным мужам, артыстам Максімам Галкіным.
«Прашу залічыць мяне ў шэрагі замежных агентаў маёй любімай краіны, бо я салідарная са сваім мужам. Сумленным, прыстойным і шчырым чалавекам, сапраўдным і непадкупным патрыётам Расеі, які жадае Радзіме росквіту, мірнага жыцця, свабоды слова і спынення гібелі нашых хлопцаў за ілюзорныя мэты, што робяць нашую краіну ізгоем і абцяжарваюць жыццё нашых грамадзянаў», – напісала артыстка.
Некалькімі днямі раней, 16 верасня, расейскае Міністэрства юстыцыі залучыла Максіма Галкіна ў спіс фізічных асобаў, якія выконваюць функцыю «замежнага агента». У ведамстве сцвярджаюць, што артыст вядзе палітычную дзейнасць і атрымлівае дапамогу ад замежнай крыніцы – Украіны.
На гэта ён заявіў, што яго прызналі «замежным агентам» з надуманай нагоды, а «доказная база Міністэрства юстыцыі не вытрымлівае ніякай крытыкі». Паводле словаў Галкіна, ён не займаецца палітычнай дзейнасцю, а грошы з Украіны ён атрымліваў, калі выступаў там з канцэртамі, «гадоў дзесяць таму».
«Са сцэны ў сваіх канцэртах я займаюся гумарыстычным жанрам, палітычнай сатырай. Калі я звяртаюся да сваіх падпісальнікаў ці гледачоў па-за жанрам, як грамадзянін, як чалавек, я гэта раблю абсалютна шчыра. Міністэрства юстыцыі, шчырасць і сумленнасць не аплачваецца ў прыстойных людзей, да якіх я, спадзяюся, адношуся. Я не прадаю свайго меркавання і сваіх думак і не купляю чужых. Я гандлем сумлення не займаюся», – сказаў Галкін.
З пачаткам расейскага ўварвання ва Украіну Максім Галкін з’ехаў з РФ і адкрыта выступаў супраць вайны і палітыкі расейскіх уладаў. У адказ на гэта ў пачатку верасня прэс-сакратар прэзідэнта Расеі Дзмітрый Пяскоў сказаў, што Максім Галкін рабіў «вельмі дрэнныя заявы» і што «яму відавочна з намі не па дарозе».
Пасля адʼезду Галкін працягваў даваць канцэрты за мяжой, а частку сродкаў ад іх перадаваў на дапамогу ўкраінскім уцекачам.
Алена Рувіна belsat.eu