Да Стамбулу дабралася першае судна пасля таго, як была спыненая збожжавая ўгода. Карабель скарыстаўся часовым транспартавым калідорам.
Кантэйнеравоз «Joseph Schulte» выйшаў з порту «Адэса», заблакаванага Расейскай Федэрацыяй, у пачатку тыдня. З 23 лютага 2022 года ён заставаўся ў гэтым чарнаморскім порце пад сцягам Гон-Конгу.
Карабель стане на якар у порце Амбарлы на поўдні Стамбулу.
11 жніўня Украіна абвесціла аб стварэнні гуманітарнага калідору для грузавых караблёў у Чорным моры. Спачатку ён будзе распаўсюджвацца на грузавозы, якія захраслі ў партах Чарнаморску, Адэсы і Паўднёвага, але не падпадалі пад дзеянне збожжавай угоды.
17 ліпеня 2023 года Расея выйшла з так званай збожжавай угоды, аб чым заявіў прэс-сакратар прэзідэнта Расеі Дзмітрый Пяскоў.
Апошнім караблём, які 16 ліпеня пакінуў порт Украіны ў рамках збожжавай ініцыятывы, быў турэцкі сухагруз «TQ Samsun».
Раман Шавель belsat.eu