Беларускі джазмен Павел Аракелян і гурт «The Outsiders» прэзентуюць 8 лютага ў віленскім клубе «Jazz Cellar 11» праект «Dedicated To…» («Прысвячаю…»).
Кампазітар, піяніст і саксафаніст Павел Аракелян вядомы як сольнай творчасцю, так і ўдзелам у гуртах «Крамбамбуля», «Apple Tea» і «Svet Boogie Band». У Беларусі яго неаднаразова прызнавалі найлепшым саксафаністам краіны.
Пасля выбараў-2020 ён падтрымаў пратэсты сваёй музыкай на дваровых канцэртах, трапляў пад арышт. Хоць вельмі не хацеў, быў вымушаны пакінуць Беларусь праз пагрозу новых рэпрэсіяў.
8 лютага ў Вільні Аракелян прэзентуе новы праект на сцэне вядомага джазавага клубу «Jazz Cellar 11». Разам з ім на сцэну маюць выйсці кантрабасіст Алекс Крышталь, піяніст Вітаўтас Страйжыс і бубнач Довідас Шульскіс. Пачатак канцэрту а 20:00, праграма з дзвюх частак – на дзве гадзіны. Квіткі каштуюць ад 23 еўраў.
Алесь Наваборскі belsat.eu
