Аляксандра Герасіменя: Беларусь цяпер цалкам ізаляваная ад усяго свету ўжо і ў спорце
Беларусь цяпер цалкам ізаляваная ад усяго свету ўжо і ў спорце. Аб гэтым 17 лістапада заявіла вядомая беларуская спартоўка Аляксандра Герасіменя, каментуючы «Белсату» рашэнне Міжнароднага паралімпійскага камітэту аб прыпыненні сяброўства Беларусі і Расеі ў гэтай арганізацыі.
Вядомая беларуская плыўчыха, двухразовая віцэ-чэмпіёнка Алімпіяды 2012 Аляксандра Герасіменя лічыць, што прыпыненне сяброўства Беларусі і Расеі ў Міжнародным паралімпійскім камітэце азначае паглыбленне ізаляцыі Беларусі ў сферы спорту.
«Гэта рашэнне МПК значыць што Рэспубліка Беларусь зараз цалкам ізаляваная ад цывілізаванага свету ўжо і ў спорце», – заявіла Аляксандра Герасіменя.
Паводле Герасімені, агулам беларускія паралімпійцы «менш за ўсё заслужылі, каб іх пазбавілі такога права». Але яна лічыць, што дапамагчы спартоўцам-паралімпійцам «наўрад ці будзе магчымым, пакуль вайна не скончыцца». «Па сутнасці, такімі справамі і павінен займацца Беларускі фонд спартовай салідарнасці, – падкрэсліла чэмпіёнка, – каб кропкава дапускаць да міжнародных стартаў пад нейтральным сцягам спартоўцаў, якія не падтрымліваюць дзейсную уладу».
Яна дадала, што супраца Нацыянальнага паралімпійскага камітэту з Міжнародным паралімпійскім камітэтам давала беларускім спартоўцам з інваліднасцю шмат магчымасцяў, «былі і праграмы фінансавання, і розныя навучальныя праграмы для спецыялістаў. Падобныя праграмы існуюць і па лініі Міжнароднага алімпійскага камітэту».
«Крыўдна што першых «зачынілі» паралімпійцаў. Лепш бы наадварот. Хаця ўлічваючы, што там наш знакаміты плывец, то рашэнне прадказальнае», – дэталізавала Аляксандра сваё стаўленне да рашэння МПК.
Аляксандра не стала называць канкрэтныя прозвішчы, аднак найбольш вядомым плыўцом-паралімпійцам зʼяўляецца Аляксей Талай, які, як ён сам расказаў у інтэрвʼю парталу «Зеркало», ездзіць на Данбас, падтрымлівае самаабвешчаныя рэспублікі і іх жыхароў. Апошнія гады ён актыўна выступаў за дзейсную ўладу і Аляксандра Лукашэнку, а нядаўна атрымаў медаль Францыска Скарыны. Пасля пачатку расейскай агрэсіі ва Украіне Талай падтрымаў так званую спецаперацыю.
Раней паведамлялася, што на пазачарговай генеральнай асамблеі 16 лістапада Міжнародны паралімпійскі камітэт прыпыніў сяброўства Беларусі і Расеі. Абедзве краіны абвінавацілі ў «няздольнасці выконваць свае сяброўскія абавязанні ў адпаведнасці са статутам Міжнароднага паралімпійскага камітэту.
«Чальцы МПК мусяць рабіць усё, каб у паралімпійскім спорце панаваў дух сумленнай гульні, ахоўваліся бяспека і здароўе спартоўцаў і выконваліся асноўныя этычныя прынцыпы. Таксама забароненыя любыя дзеянні, што супярэчаць мэце або задачам Параліміпійскага камітэту ці пагражаюць пагаршэннем рэпутацыі МПК, паралімпійскага руху або паралімпійскага спорту», – адзначаецца ў паведамленні МПК.
Нацыянальныя паралімпійскія камітэты Беларусі і Расеі ў сувязі з рашэннем МПК губляюць усе правы сяброўства ў арганізацыі, за выключэннем права на апеляцыю.
Рэакцыя НПК Беларусі на прыпыненне сяброўства
Тым часам, старшыня Нацыянальнага паралімпійскага камітэту Беларусі Алег Шэпель заявіў 17 лістапада, што краіна звернецца ў суд адносна рашэння МПК.
«Адхіленне гэта незаконнае, няправільнае, і палітыка не павінна пераважаць у паралімпійскім руху», – адзначыў Алег Шапель, удакладняючы аднак, што ў НПК Беларусі чакалі ад МПК «прыкладна такога рашэння, хаця прарабілі вельмі вялікую працу з нацыянальнымі паралімпійскімі камітэтамі».
Шэпель паведаміў, што Беларусь плануе звярнуцца ў суд Нямеччыны ў сувязі з прыпыненнем членства Паралімпійскага камітэту Беларусі ў МПК, «таму што Міжнародны алімпійскі камітэт зарэгістраваны ў Боне». Таксама «плануецца зварот ад імя спартсменаў, указаць на тое, што МПК парушае адзін з артыкулаў Канстытуцыі Германіі, дзе дакладна прапісана недапушчэнне дыскрымінацыі людзей па розных прыкметах».
Перадгісторыя канфлікту
У сакавіку 2022 года, неўзабаве пасля пачатку расейскай агрэсіі ва Украіне, у Пекіне прайшлі XIII зімовыя Паралімпійскія гульні, да удзелу ў якіх упершыню ў гісторыі не былі дапушчаны каманды Беларусі і Расеі.
«Мы ў МПК цвёрда перакананыя, што спорт і палітыка не павінны змешвацца. Аднак не па сваёй віне вайна прыйшла да гэтых Гульняў, і за кулісамі многія ўрады маюць уплыў на нашу запаветную падзею», – заявіў тады Эндру Парсанс, прэзідэнт МПК.
Агулам на гульні ў Пекіне не былі дапушчаны 83 чалавекі, якіх Парсанс назваў «ахвярамі дзеянняў вашых урадаў», і выказаў шкадаванне, што на лёс паралімпійцаў паўплывалі рашэнні, прынятыя ўрадамі Беларусі і Расеі «у сувязі з парушэннем алімпійскага перамір’я».
Хто такая Аляксандра Герасіменя
Аляксандра Герасіменя – беларуская плыўчыха, двухразовая віцэ-чэмпіёнка Алімпійскіх гульняў 2012 года (50 і 100 метраў вольным стылем), уладальніца залатых узнагарод чэмпіянатаў свету і Еўропы як на «доўгай вадзе» (басейн 50 м), так і на «кароткай» (басейн 25 м). Шматразовая чэмпіёнка Універсіяд (2009, 2011 і 2013). Заслужаны майстар спорту Рэспублікі Беларусь (2012). Выступала ў плаванні вольным стылем, на спіне, батэрфляем. У кастрычніку 2020 года ўзначаліла Беларускі фонд спартовай салідарнасці. Актыўна ўцягнута ў апазіцыйную палітычную дзейнасць.
У красавіку 2022 Аляксандра Герасіменя заявіла, што пакідае Беларускі фонд спартовай салідарнасці, які да таго ўзначальвала. Прычынай выхаду з фонду сталі «разыходжанні ў поглядах з калегамі наконт таго, як трэба весці справы ў фондзе».
Антон Тачняк belsat.eu
