Міністр абароны распавёў, што рэгіянальная групоўка ў Беларусі распачала выкананне задач
Міністр абароны Віктар Хрэнін падчас сустрэчы з калектывам на Менскім трактарным заводзе распавёў пра рэгіянальную групоўку, якая створаная ў Беларусі. Пра гэта піша Telegram-канал ведамства.
Рэгіянальная групоўка войскаў Беларусі і Расеі пачала разгортванне і выкананне задач, заявіў міністр абароны Беларусі Віктар Хрэнін. Паводле словаў вайскоўца, праца па стварэнні групоўкі вядзецца паэтапна, а яе мэта – абарона межаў так званай Саюзнай дзяржавы.
«Мы ні на кога не збіраемся нападаць. Яшчэ раз падкрэсліваю, што задачы гэтай групоўкі выключна абарончыя. А ўсе мерапрыемствы, якія ладзяцца цяпер, накіраваныя на адэкватнае рэагаванне на тое, што адбываецца паблізу нашых межаў. У цэлым жа мы лічым, што рэалізаваныя цяпер і спланаваныя захады стратэгічнага стрымлівання Узброенымі Сіламі забяспечваюць дэманстрацыю гатовасці да абароны нашай краіны і нанясення непрымальнай шкоды агрэсару. Але ўсё ж асновай нашай ваеннай палітыкі застаецца пазіцыя, што мэтазгодней не бразгаць зброяй, а садзіцца за стол перамоваў і дамаўляцца», – распавёў міністр.
Беларускія вайскоўцы і чыноўнікі паўтараюць, што Беларусь не прымае ўдзел у вайне Расеі супраць Украіны, а таксама, што ў краіне няма мабілізацыі. Пры гэтым яны не ўзгадаваюць, што менавіта з тэрыторыі Беларусі адбыўся напад расейскіх войскаў ва Украіну 24 лютага. Таксама, што менавіта з тэрыторыі нашай краіны расейскія войскі наносяць ракетныя ўдары, падчас якіх гінуць мірныя людзі і руйнуецца інфраструктура.
Алена Аляксандрава belsat.eu
