N.R.M. мае намер паехаць ва Украіну, дзе плануе арганізаваць канцэрт для байцоў Палка Каліноўскага. З гэтай нагоды гурт распачаў збор сродкаў для падраздзялення. Музыка гурта Піт Паўлаў у эфіры «Белсату» распавёў пра ідэю зладзіць канцэрт для байцоў ва Украіне.
У афіцыйным тэлеграм-канале Палка Каліноўскага з’явілася афіцыйная заява аб тым, што пад Бахмутам беларускія ваяры панеслі страты. Ёсць адзін загінулы, чацвёра зніклі без вестак, а яшчэ некалькі атрымалі раненні.
Музыка гурта N.R.M. Піт Паўлаў распавёў, што цяпер, падчас арганізацыі канцэрту для байцоў палка, навіна пра смерць сярод каліноўцаў ускалыхнула яго.
«Маладыя, лепшыя з лепшых гінуць на вайне – самае страшнае, што можа адбыцца. Здавалася, што цяпер ніхто не загіне, чакалі наступу. Нашыя хлопцы ў такім месцы, цяжка пра гэта чуць. Я цяпер у асабістым кантакце шмат з кім з палка Каліноўскага», – кажа Піт Паўлаў.
Музыка кажа, што сам адчувае вострую неабходнасць супрацьстаяць гвалту, несправядлівасці. Таму калі з’явіўся полк, то ўзнікла жаданне далучыцца да іх, але механічна трапіць туды складана вельмі.
«Большасць байцоў ва Украіне з 2014 году. Нацыянальная адзінка з’явілася пазней. Я сэрцам быў заўсёды з імі. А пазней нават высветлілася, што некаторыя з іх трэніраваліся ў той самай залі, дзе я таксама трэніраваўся. Цалкам магчыма, што мы добра знаёмыя, што я паказваў ім некаторыя прыёмы. Зразумела, што ў мяне даўно было жаданне прыехаць да іх. А пазней я даведаўся, што яны чакаюць N.R.M. І гэта дадало такой дадатковай матывацыі наведаць іх», – кажа Піт Паўлаў.
Музыка кажа, што бачыць сярод беларусаў стомленасць ад вайны, стомленасць ад рэпрэсіяў, вымушанай міграцыі.
«Некаторыя нават кажуць, маўляў, можа варта было застацца ў Беларусі, адседзець некалькі гадоў у турме. Але мая задача такая, што павінныя вярнуць сабе сваю краіну. Што гэта не спосаб падпарадкавацца гвалту. На тым баку няма нават 1 %. Там нават 3 % няма. Проста жменька людзей. А нас амаль 10 мільёнаў грамадзянаў краіны», – перакананы спявак.
Таму, на яго думку, беларусы мусяць аб’яднацца і вярнуць сабе краіну.
Алена Аляксандрава belsat.eu