Бел-чырвона-белы сцяг з прозвішчамі беларускіх палітвязняў, які стварыла журналістка «Белсату» і грамадская актывістка Марыя Грыц, прадалі на анлайн-аўкцыёне ebay за 1125 долараў.
Стваральніца сцягу паведаміла, што сродкі ад яго продажу будуць накіраваныя на падтрыманне семʼяў беларускіх палітвязняў.
Сцяг быў выстаўлены на аўкцыён 8 лютага. Стартавы кошт склаў 120 долараў.
Гэты ўнікальны бел-чырвона-белы сцяг Марыя Грыц стварыла напрыканцы студзеня 2022 году, калі колькасць палітычных зняволеных у Беларусі перавысіла тысячу чалавек. На сёння за кратамі ў Беларусі застаюцца 1062 асобы, прызнаныя праваабаронцамі палітвязнямі.
«Пісаць імёны было для мяне як малітва», – прызналася Марыя Грыц падчас размовы ў студыі «Белсату».
Яна таксама сказала, што 8 метраў тканіны чакаюць свайго часу – магчыма, будзе новы сцяг. Цалкам размову з аўтаркай сцяга з імёнамі палітвязняў можна паглядзець у праграме «Студыя Белсат».
ЗК belsat.eu
