Гомельскі абласны суд разгледзеў справу паводле артыкулу аб вербаванні грамадзянаў для ўдзелу ва ўзброеным фармаванні на тэрыторыі замежнай дзяржавы. Аднаго фігуранта прыгаварылі да 5 гадоў, другога – да 1,5 года, паведамляецца на сайце Вярхоўнага Суда.
Паводле версіі следства, адзін мужчына ў Instagram неаднаразова публікаваў допісы дзеля схілення грамадзянаў да ўдзелу ў палку Каліноўскага, «Азове» ды іншых фармаваннях ЗСУ. Ён таксама перавёў грошы на рахунак палка Каліноўскага. Разам з іншым мужчынам ён «паводле папярэдняй змовы» ў сакавіку летась нібыта «нанёс цынічныя надпісы і выявы на сцены шэрагу будынкаў». Шкоду ацанілі на Br 131.
Першаму фігуранту прызначылі 5 гадоў калоніі ўзмоцненага рэжыму, другому – 1,5 года калоніі агульнага рэжыму.
Адзначаецца, што прысуд не набыў моц, таму можа быць абскарджаны.
Сяргей Крот belsat.eu