Жыхары сталіцы Афганістану спрабуюць выбрацца з гораду, захопленага тэрарыстамі «Талібану». Наземныя межы талібы кантралююць ужо некалькі дзён.
Паводле сведак, у аэрапорце Кабулу загінулі прынамсі пяць чалавек, якія спрабавалі прарвацца ў самалёты, што адляталі з гораду, піша Reuters.
Загінулі людзі ў цісканіне ці былі застрэленыя, не вядома. Аднак у аэрапорце вечарам 15 жніўня было чуваць стрэлы, натоўп разбягаўся. Афганскі тэлеканал TOLOnews сцвярджае, што людзі былі параненыя і забітыя менавіта ў страляніне.
Паводле непацверджаных звестак, страляць маглі замежныя ахоўнікі аэрапорту. Раней афіцыйны прадстаўнік Злучаных Штатаў казаў, што амерыканскія сілы стралялі ў паветра, каб разагнаць натоўп.
Абноўлена. У інтэрнэце цыркулюе відэа, на якім, як сцвярджаецца, людзі выпадаюць з самалёта ў небе над Кабулам. На іншым відэа бачна, што некаторыя сядалі проста на шасі самалёта.
Учора баевікі радыкальнага ісламісцкага руху «Талібан» без бою ўвайшлі ў Кабул. Раней яны абвесцілі, што цалкам кантралююць тэрыторыю Афганістану.
Прэзідэнт Афганістану Ашраф Гані пагадзіўся сысці ў адстаўку. Паводле медыяў, яшчэ да ўваходу талібаў у Кабул ён пакінуў прэзідэнцкі палац і вылецеў у Таджыкістан. Раней з краіны ўцяклі некалькі кіраўнікоў міністэрстваў, у тым ліку міністр абароны, а таксама віцэ-прэзідэнт Афганістану.
АА belsat.eu
