Праз аварыю на сетках водазабеспячэння ў Пружанах, дзе жыве каля 18 тысяч чалавек, з раніцы 16 студзеня часова адключана падача вады. Пра гэта паведаміў Пружанскі райвыканкам.
«У сувязі з правядзеннем аварыйна-аднаўленчых работ на сетках водазабеспячэння і каналізацыі гораду, пружанскае КУВП «Камунальнік» вымушана часова прыпыніць падачу вады спажыўцам. Пра кропкі падвозу пітной вады насельніцтву будзе паведамлена ў бліжэйшы час», – гаварылася ў паведамленні.
Пазней гарадскія ўлады арганізавалі 11 месцаў з прывозам вады. Аднак раённы цэнтр гігіены і эпідэміялогіі «настойліва рэкамендуе кіпяціць ваду, набраную ў месцах падвозу, перад ужываннем», паведамляе мясцовае выданне «Раённыя будні».
Таксама камунальнікі настойліва просяць жыхароў «мінімізаваць выкарыстанне каналізацыі і такім чынам пасадзейнічаць больш хуткаму правядзенню рамонтна-аднаўленчых работ».
Аб тэрмінах аднаўлення падачы вады ў горадзе не паведамляецца.
Алена Рувіна belsat.eu
