Увечары 14 кастрычніка Ізраіль нанёс паветраны ўдар па міжнародным аэрапорце сірыйскага Алепа, у выніку чаго ён быў выведзены з ладу. Пра гэта паведамляе Reuters.
«Ізраільскі вораг ажыццявіў паветраны напад з боку Міжземнага мора, на захад ад Латакіі, на міжнародны аэрапорт Алепа, што спрычынілася да матэрыяльнай шкоды аэрапорту і вываду яго з працы», – паведаміла сірыйскае міністэрства абароны.
Аэрапорт пачаў працаваць толькі 14 кастрычніка пасля таго, як 12 кастрычніка адначасовыя ракетныя ўдары Ізраілю па аэрапортах у сталіцы Сірыі Дамаску і паўночным горадзе Алепа пашкодзілі ўзлётна-пасадачныя палосы і вывелі з ладу абодва аэрапорты. Аэрапорт Дамаску па-ранейшаму не працуе.
Удары па аэрапортах закліканыя парушыць іранскія лініі забеспячэння ў Сірыі. Тэгеран тут падтрымлівае рэжым прэзідэнта Башара Асада і адначасова пагражае Ізраілю з прычыны ягонай вайны з «Хамасам».
Цагаль заяўляе, што правёў «лакалізаваныя рэйды» на тэрыторыі сектару Газа, каб паспрабаваць знайсці закладнікаў. Удзел у рэйдах прымалі як пяхотныя, так і танкавыя падраздзяленні.
Якуб Хруст belsat.eu
